Пытартыш кечылаште шукынжо ик томаша нерген гына икте-весыштлан каласкаленыт, очыни: шочмын, 23 мартыште, Йошкар-Олаште республикысе перинатальный рӱдер гыч азам шолыштыныт!
Кученыт
Пиалеш, тиде осал пашам ыштышым полиций пашаеҥ-влак тиде кечынак, 11 шагат наре жап гыч, 22 шагат гутлаште, кученыт. Марий Элысе МВД министрын кӱштымашыж почеш, полицийын пӱтынь личный составшым «тревого» дене кынелтеныт да йочам кычалаш тӱҥалыныт. Тиде пашашке тыгак кычалше группо, волонтер, тыглай еҥ-шамыч ушненыт. Полиций пашаеҥ-влак перинатальный рӱдерыш толын кайыше, тушто эмлалтше-шамычым, роддом деке толшо да кайыше видеокамерыш логалше машиналам тергеныт да шолыштшым муыныт. Азам 33 ияш ӱдырамашын шолыштмыжым рашемденыт. Тудым Йошкар-Оласе Подольский курсант-влак уремыште верланыше пачерыште кученыт да азам поген налыныт, вара аважлан пӧртылтеныт.
Ласкан нумал лектын
Кызытеш палдарыме почеш, чылажат теве кузе лийын. Шочмын кечывал лишан, 11 шагатат пеле гутлаште, ик ава выпискылан ямдылалтын да процедурыш каен улмаш. Тиде жапыште кум кечаш гына азаже тушто шкет кодын. Шолышташ шонышо еҥ тидын дене пайдаланен да йочам нумал луктын.
А тылеч ончыч тудо шкенжым мӱшкыранла кучен – вес семын каласаш гын, ондален. А тиде кечын пуйто азам ышташ жапше шуын да марийжым больницыш наҥгаяш йодын. Кеч вес шонымашымат ойлат. Пуйто ӱдырамаш кугу срокышто азажым йомдарен – выкидыш лийын да йочаже колен. Тидын нерген тудо лишыл еҥже-шамыч кокла гыч иктыланат каласен огыл да, вес аван икшывым шолыштын, йочан лияш шонен. Но чынже дене мо да кузе лийме кызыт рашемдалтеш.
Тунам, шочмын, азам ыштыше ӱдырамаш-влаклан чиктыме гаяк халатым чиен да тудо нимогай нелылык деч посна перинатальный рӱдерын ик палатышкыже пурен, икшывым налын да марийже деке аза дене лектын.
Кузе тыге? Выкидыш дене ӱдырамаш тиде рӱдерынак хирургий отделенийыштыже киен. Санденак тудын келшен толшо саде халатше лийын да азам ыштыме отделенийышкат подвал гоч корно улмым пален. Тиде амал денак тудым иктат йот, палыдыме еҥлан шотлен, кучен шогалтен огыл. Шке пациентыштак коштеш манын веле шоненыт.
Но чынже дене мо да кузе лийме кызыт рашемдалтеш.
Писын «ыштымыже» ӧрыктаренат огыл?
Оҥай, марийжын нимогай йодышыжат лектын огыл мо? Очыни, кажныже тыге шоналта. Уке, очыни, вет вес версий почеш, ӱдырамашын чынже денак выкидыш лийын, но марийжылан тудо тидым каласен огыл. Ондален: пуйто азам сайынак ыштен, но прививкым шындаш икшывыштым перинатальный рӱдерыште коденыт. Тыге икмыняр жап гыч ӱдырамаш тушко марийжым машина дене кондыктен да еҥ йочам, адакшым эн моторракшым, налын лектын, вара мӧҥгышкышт ласкан кудалыныт. Тиде жапыште пелашыже преступленийым ышта манын, пӧръеҥ паленат огыл!
Тиде преступленийым ыштымыж годым шолыштшо ӱдырамаш могай состоянийыште лийын? Тидым тергаш судебно-психитарический экспертизе лиеш, палдара Марий Элысе Следствий управлений.
Кушко онченыт?
Республикын тазалыкым аралыме министрже Марина Панькован умылтарымыж почеш, роддомыш ӱдырамаш хириургический корпусын подвал пӧлемже гыч пурен да служебный вход гыч лектын.
Перинатальный рӱдерыш ӱдырамаш тӱҥ омса гыч огыл пурен гынат, вараже, туткар лиймеке, тудым петыреныт.
Тиде томаша шотышто рӱдерын тӱҥ врачше Николай Сушенцов (ты томаша деч вара тудым эрлашыжымак паша гыч кораҥденыт) тыге ойлен:
— Мемнан дене видеокамер уло, но тудо тугай верыште огыл кеча, кудо следствийлан кӱлешан. Изи ӱдыр илыше да таза. Тудым врач-влак консилиум терген.
Мутым кучат
Тиде факт шотышто кок уголовный делам тарватеныт – тиде «Халатность» да «Похищение несовершеннолетнего», палдара РФ Следствий комитетын Марий Элысе следствий управленийже.
Лучо ашнаш налже ыле!
Шоналташ гын, шолыштмо азан аважым моткоч жал. Кычалме 11 шагат наре жапыште тудо мом гына шонен пытарен, ойгырымыж дене мыняр шинчавӱдшым йоктарен огыл?! Тыгайым чытен лекташ иктыланат ынже пӱрӧ!
Вес велым, шолыштшо ӱдырамашыжымат чаманыме кумыл лектеш. Тудо мӱшкыраҥын да ава лияш ямдылалтын. Очыни, икшывыжым рӱпшен коштмыжым, тудлан малтыме мурым мурымыжым, пелашыж ден коктын шочшыштым вӱчкен-шупшал малаш пыштымыштым… ик гана веле огыл ушыштыжо сӱретлен да аза шочмо татым изин-кугун вучен илен. Но пиал лугыч лийын. Да, нимолан ӧрын, ӱдырамаш тыгай преступленийым ыштыме марте шуын. Но арам! Тыге шке илышыжым шкежак эшеат чот локтылын, вет тудым эрык деч посна кодат. Четлык коклаште ынде 12 ий марте жапым эртарашыже логал кертеш. Лучо Аза пӧрт гыч икшывым ашнаш налже ыле…
Любовь КАМАЛЕТДИНОВА
