Марий Элын Молодёжный политике, спорт да туризм министерствыже тенийлан турист маршрут да экскурсионный программе реестрым ямдылен.
Тушко чылаже 287 маршрут пурталтын. Нуно тӱрлӧ шӧрынан улыт: экологий, гастрономий, калык ойыртем дене кылдалтше, ялысе, паломник да моло тӱрлӧ тур-влак. Культурно-познавательный, активный, йоча маршрут-влакат ешаралтыныт. Ик эн палымыже — «Чудеса земли Марийской» ден «Край звонких гуслей» бренд маршрут-влак. Иктышт Йошкар-Ола ден Козьмодемьянск олалам авалтыт, весышт «Кугу Какшан» заповедникыш да «Марий чодра» национальный паркыш «наҥгаят», «Пугачёвын тумыжым», Шереметьев замокым «ончыктат». Нине тур-влак кызытат шуко еҥым чумырат. Изирак ийготан-шамычлан «Прогулки с Йошкиным котом» экскурсий моткоч келша. Кодшо ийын Йошкар-Оласе турист-увер рӱдерын инвалид-влаклан темлыме «Царев город без преград» экскурсийымат шукын ойырен налыт. А тений эше Кугу Отечественный сарыште сеҥымылан 75 ий теммылан пӧлеклалтше у программе-влакат ешаралтыныт.
С.НОСОВА
