2020 ийыште Руш географический обществын премийжылан конкурс увертаралтын.
Йодмашым обществын официальный сайтыштыже 1 июнь марте пуаш лиеш.
Тиде премий национальный георафий, экологий областьлаште, элнан пӱртӱс, историй да тӱвыра поянлыкшым кумдан шарыме, географий наукым вияҥдыше-влаклан полышым пуымо шот дене 2014 ий гыч кок ийлан ик гана ойыралтеш. Тудо тӱнямбал кӱкшытан.
Тений премийым 8 номинацийыште палемдат:
Географий да смежный наукылаште эн сай шанче проект;
историй да тӱвыра памятник-влакым арален, уэмден толмашке виктаралтше археологий, этнографий да смежный областьлаште эн сай историко- культурный проект;
географий областьыште эн сай образовательный проект;
Россий мучко эн сай экспедиций;
пӱртӱсым аралыме дене кылдалтшу эн сай проект;
эн сай медиапроект;
Эн сай молодежный проект (14 гыч 35 ияш марте участник-влак ушнен кертыт).
Тений икымше гана «Эн сай турист проект» номинаций пурталтын. Эл кӧргышто да ӧрдыж гыч толын коштмо туризмым вияҥдыме дене кылдалтше проект-влакым аклаш тӱҥалыт.
С.НОСОВА
