БИЗНЕС

Тек у кече конда у пиалым

Тыгай шонымаш дене ила да ӱмыржӧ мучко сатум ужалыме сферыште тырша Советский район Вечын селаште «Рассвет» ООО-н генеральный директоржо Светлана Гасанова. Вуйлатыме пашам тиде поро чонан да чолга ӱдырамаш 9 ий шукта.

Вуйлатышыным гына мо? Сатум ужалашат шогалеш, кунамже тудым автомашина денат шкак конда, шкак ястара….

А кевыт паша шотышто ойлаш гын, Светлана Григорьевна ты профессийлан изинек шӱман улмаш. Тидыже, манмыла, вӱрыштак гын, мом ыштет – аважат тиде сомылымак ыштен, эсогыл кочажат шке жапыштыже продавец, бухгалтер лийын.

– Шершот дене шотлаш изиэм годымак тунемынам, – ойла предприниматель.

Санденак шканже шӱм-чонлан келшыше профессийым ойырымеке, тунем лекмеке, ӱдыр Йошкар-Оласе Советский уремыште верланыше «Океан» кевытыште пашам ышташ тӱҥалын. Тушто кок ий тыршымеке, марлан лектын, а икмыняр жап гыч тудым пӱрымашыже Москваш савыралын. Элнан рӱдолашкыже Светлана Григорьевна вахте йӧн дене кандаш ий коштын, тӱҥ шотышто кочкыш сатум темлыше кевытлаште пашам ыштен. Шочынжо тудо Волгоград областьыште, но ача-аваже Вечын кундемын шочшыжак лийыныт, санденак койдымо вий тышкак шупшын. Тудлан селасе «Рассвет» кевытыште сатум ужалышын пашажым темленыт, а пел ий гыч ӱдырамаш тудын вуйлатышыже лийын.

– Конешне, директорын пашажым ышташ тӱҥалме годым лӱдыкшынат чучын, но бухгалтерна Галина Кузьминична Ребринан кумылаҥден моштымыжлан мый шеҥгеке чакнен омыл. Тудо мылам эре тыге ойлен: «Кече лиеш – кочкыш лиеш», – Светлана Григорьевна пеленнак верланыше илалше ӱдырамашым порын ончале.    

– Тыште бухгалтерлан пашам ышташ 1979 ийыштак тӱҥалынам, – тудыжо ойлаш тӱҥале, – Тунам села чоҥалтын гына. А тиде кевытым перестройко тӱҥалмеке, 1992 ийыште, почыныт: окса чӱдылыклан кӧра колхозник-шамычлан пашадар олмеш шӧрым, киндым пуэныт. Пекарне шкенанак лийын.

Светлана Григорьевнан вуйлаташ тӱҥалмыж годым сату оборот уда огыл лийын, эсогыл кевытым уэмден олмыктен кертме. Но пытартыш жапыште ужалыме паша шонымо семын ворана манаш огеш лий.

– «Пятёрочка», «Магнит» гай кугу кевыт-шамыч дене конкурент лияш моткоч йӧсӧ. Мемнан села гыч кажне шагатат пелыште автобус Советский посёлкыш кудалыштеш, калыкым шупшыкта. Кызыт шукыштын шке автомашинашт уло, ола гыч сатум налын кондат, – ойла вуйлатыше. – Туге гынат пашам ыштена, калыкын йодмыжым шуктена, санденак кевытыштына ик эн кӱлешан сатум темлена: кочкыш изделий деч посна изиш дене молат  уло.

«Рассвет» ООО-н тыгаяк лӱман барже уло, тудо канаш келыштаралтын да тиде оралтышак пырдыж гоч гына верланен. А эше ик кевытше Вечын ял шотан илемыш пурышо Колянур ялыште уло,   

– Умбакыже вияҥме шотышто шонымаш шуко, но 2021 ийыште налогым тӱлымашке вашталтыш пурталтшаш. Сандене вучалтыман. Такшым, чыным ойлаш гын, тӱрлӧ нелылыкат вашлиялтын, чыла сеҥенна, чыла илен лектынна, ынде ниможат лӱдыкшын ок чуч, – каласыш Светлана Григорьевна.     

Тудым колыштын, эскерен, кумдан палыме руш поэт Николай Некрасовын «Мороз, Красный нос» поэмыж гыч «Есть женщины в русских селеньях…» ужашыже шарналте. Содыки, улыт мемнан кундемыште моткоч кугу кӧргӧ виян, кеч-могай пашамат моштен ворандарыше ӱдырамаш-влак, нунын кокла гыч иктыже – Светлана Григорьевна. Предприниматель паша – кеч-кӧланат тачысе куштылго огыл саманыште неле сомыл, тидын деч посна тудым таче шуко шочшан ава манын каласаш лиеш. Шкенжын кок ӱдыржӧ гыч иктыже кызыт Москошто тырша, а пеленже кокымшыжо да шукерте огыл илыш дене чеверласыше шӱжаржын кум икшывыже. Ава деч посна кодшо йоча-влакым тудо шке шулдыржо йымаке налын.  

– Икшыве-влак ушан-шотан, таза кап-кылан да пиалан лийышт. Кажне авалан тиде – илышыште эн тӱҥ, – каласыш тудо.

Г.КОЖЕВНИКОВА

Ю.Исаковын фотожо

Опубликовать в Одноклассники

Добавить комментарий