Марий Элыште вуйуш пудыраныме черан икшывым куштышо еш ден кугыеҥ-влаклан ресурсный консультативный рӱдер почылтын.
Тидыже «Раскрась мир» мер организацийын чолга еҥже-влакын тыршымышт да Президент грант фондын полшымыж дене ышталтын.
Еш да районла гыч специалист-шамыч дене рӱдерыштат, дистанционнат пашам ыштат. Нунылан туныктымо курс ден семинар-влак лиедат. Ача-ава-влаклан тыгай икшывышт-влак дене мӧҥгыштӧ занятийым, тыгак нунын да черле кугыеҥ-влакын кечыштым кузе эртарыме шотышто ой-каҥашым пуат.
Верлашке лектынат туныктат. Шукерте огыл семинар-практикум-влак Шернурышто да У Торъялыште эртеныт.
Тыгай вашлиймаш ден психологический тренинг кажне тылзын лийыт. А кеҥежым нуным еш дене лекме да палатке лагерьыште вучаш тӱҥалыт.
Марий Элысе Тазалык министерствын данныйже почеш, 2019 ийыште «Расстройство аутистического спектра» (РАС) диагноз 108 икшывылан шындалтын.
Проектын пытартыш мероприятийже аутизм йодыш дене «РАСкрась мир» III межрегиональный форум лиеш. Тушко вес регионла гычат спикер-шамыч толыт.
Консультационный рӱдер тыгай адрес дене верланен: Йошкар-Ола, Киров урем, 3А/1, 3-шо №-ан офис.
Лекше йодышым рашемдаш «шокшо линий» пашам ышта. Тудын номерже-влак тыгай улыт: +7(8362)387-271, +7(967)75-70-271.
Л.КАМАЛЕТДИНОВА
