Газетыштыда калыкын нарынчалге тӱсан сетке контейнерыш торым йоҥылыш погымыж нерген возенда ыле. Йодышем рашемдаш полшыза, пожалуйста: тыгай йоҥгытыш лачшымак могай пластикым кышкыман?
О.Кузнецова
Звенигово район
Йодышлан «Благоустройство» ООО региональный операторын Йошкар-Оласе калык дене пашам ыштыше абонент пӧлкаштыже тыге вашештышт:
– Пластикым погымо нарынчалге тӱсан контейнерыш пуста ПЭТ-кленчам кудалташ лиеш. Тыгодым петыртышыжым рончен кодыман, молан манаш гын тудым вес тӱрлӧ пластик гыч ямдылат, сандене переработкылан келшен огеш тол. Йоҥгытышто да шӱкым шупшыктышо машинаште верым аныклаш манын, кленчам лучо йол дене тошкен лаптырташ. Тыгеже мусоровоз шукырак шӱкым налын кертеш да тышке-тушко шуэнрак кудалыштмыж дене экологийым тынарак огеш локтыл.
Нарынчалге тӱсан йоҥгытыш тыгак канистрым, полиэтилен плёнкым, пакетым, шампунь, душышто пайдаланыме гель да моло косметике деч кодшо пластик упаковкым кудалташ лиеш. Озанлыкыште пайдаланыме химий, тыгак йогурт, шӧр, кефир деч ярсыше пластик кленчамат (но стаканым огыл!), ведрамат, тазымат, «рӱдыдымӧ» ручкамат, линейкымат угыч переработатлат.
Тыгай йоҥгытыш кудалташ чарыме торлан кечшудо ӱй деч кодшо кленча, торт, пирожный, печене, салат, муно деч ярсыше упаковко, продуктым, мутлан, полуфабрикатым, пыштыме наста шотлалтыт. Ырыктыме годым тыгай пластик гыч аяран вещества лектеш, сандене компаний-влак нуным переработатлаш огыт нал.
Торым ойыркалыме годым знак-влакым шотыш налаш лиеш. Изделийыште 01, 02, 04, 05 маркировко уло гын, тиде пластикым нарынчалге контейнерыш ӧрде кудалташ лиеш. А теве 03, 06, 07 маркировкан изделий – «чарыме» радам гыч, тудым лучо чыла тӱрлӧ шӱкшакым погымо йоҥгытыш кудалташ.
М.ИВАНОВА
