Кугу сеҥымашлан 75 ий да Марий Эллан 100 ий темме вашеш эртаралтше «Шочмо мландын кугу вийже» фестивальым эртыше шуматкечын Советский районысо усталык коллектив-влак мастарлыкым ончыктеныт.
Тыге маналтын Советский районын концерт программыже. Тиде кундем гыч Кугу Отечественный сарыш 8 тӱжем 600 салтак каен. Нунын кокла гыч 4468 еҥ мӧҥгыжӧ пӧртылын огыл. Сар жапыште немыч тӱшка ваштареш талын кредалмаште лӱддымылыкым да чолгалыкым ончыктымыштлан Алексей Николаевич Громов Совет Ушем Герой лӱм дене, а Келеев Николай Трофимович Чап орденын кум степеньже денат палемдалтыныт. Советский районышто илыше-влак сӧй пасушто илаш-колаш кредалше да сеҥымашым лишемдаш полшышо-влакым порын шарна да кызытат нунылан тауштен илат.
Кажне кундем шке моторлыкшо, пашаче калыкше дене ойыртемалтеш. Кажнылан шке шочмо кундемже шерге. Тыгай шонымаш денак шке концерт программыштым Советский районысо усталык коллектив-влак гимн дене почыныт. А умбакыже йошкар шӱртӧ семын Кундыш кугызан (Владимир Петров) уныкажлан (Денис Марченков) шарналтен каласкалымыже эртен. Сарыште тушман-влакым чактараш манын, «Чодыра саска» колхозын ешыже да Оваснур лесхоз самолет чоҥымашке оксам поген колтен улмаш. Оваснур ял калык пашалан тале лийын, а каныш годым муренат, куштенат моштен. Тидым «Кугезе кумыл», «Жемчужинки» ансамбль-влак муро да куштымаш гоч ончыктеныт. Тунам емыж да саскалан поян олык ден чодыра вӱран мландыш савырна манын, мутат уке, нигӧ шонен огыл. Но кенета, ӱдырамаш, пӧръеҥ-влак, («Эр ӱжара» ансамбль) эм шудым поген коштын нойымекышт, изиш каналташ шинчыныт, но кенета кава пычкемыштын. Сар тӱҥалын! Шучко сар тӱжем дене суртым тулыкеш коден, а мыняр шинчавӱдым йоктарен?! Элышкына керылт пурышо немыч тӱшкам кырен шалаташ манын, Марий кундемнан мыняр ӱдыр ден эргыже тушко каен?! Чыла паша ялыш кодшо изи йоча ден илалше-шамычлан логалын. Тылыште тыршыше-влакланат куштылгыжак лийын огыл, нунат сеҥымашым тапташ полшеныт. Чодырам пӱчмаштат ӱдыр, ӱдырамаш-влаклан («Весела кумыл» ансамбль) чот тыршашышт логалын. Йырваш чылан ойгыреныт, а южгунам муро, куштымаш але, иктаж семӱзгарым шоктен, ойгыштым «шулыктареныт». «Мари гармонь» трио, «Сувенир» ансамбль семӱзгар йӱкышт дене зал калыкымат сайынак шортареныт. Чынжымак тунамсе сем, муро-влак ойган лийыныт, но сарыште лийше-влак нунын полшымо дене мыняр-гынат неле жап нерген «монден кертыныт». 1418 кече да йӱд мучко шуйнышо сарыш логалше кажне салтак, тылыште, ялыште тыршаше кажне еҥ сеҥымашым лишемдаш полшен, сандене мемнам тушман сеҥен кертын огыл. Сандене нунын лӱмышт таче кечылан шӧртньӧ буква дене возалтыныт. Тек ончыкыжымат мемнан Россий вияҥеш да пеледеш, тек эреак тыныс илыш да канде кава, чевер кече мемнам куандарат. Тидын лӱмеш Советский вел «Земляки», «Муро аршаш», «Сувенир» ансамбль-влак да солист Лилия Алексеева мемнан элнам да шке кундемыштым чапландарен, сылне мурым муреныт.
Алевтина БАЙКОВА
М.Скобелевын фотожо
