КУЧЕМ УВЕР

Шотан темлымашым йодын

Эртыше кечылаште А.Евстифеев 2020 ийыште республикыште корным олмыктен ачалыме да чоҥымо йодыш дене совещанийым эртарен.

Тудо палемден: корным олмыктымо теме пешак пӱсӧ, сандене, келшыше температур лиймеке, пашам тӱҥалаш вуйын шогышо еҥ, службо ден организаций-шамычын ямде улмыштым каҥашеныт.

– Южын температуржо палынак вашталтмылан кӧра корно чот локтылалтын. Ола уремлаште келгемше лакым петыркалыме дене гына серлагаш ок лий. Корным чоҥымо пагытын толын шумыж деч ончычак тидын нерген шоныман. Ты паша кодшо ий деч удан огыл шукталтшаш, –  палемден регион вуйлатыше.

Марий Эл правительстве председательын икымше алмаштышыже А.Сальников тений олмыкташ палемдыме кумдык, чоҥышаш корно да ты сомыллан кучылтшаш окса кугыт дене палдарен.

Совещанийын участникше-влак Йошкар-Оласе корно отрасылыште ыштышаш мероприятий ламрадамлын каҥашен лектыныт. Олан мэрже Е.Маслов телым корным елыме асфальтобетон вартыш дене гына олмыкташ лийме нерген ойлен. А тыгай пашаже кажне ийын ышталтеш.

Транспортлан кудалышташ лийже манын асфальт пудыргым оптен тӧрлат. Магистральный урем деч ӧрдыжтӧ известкан шолдыра шаргӱм кучылтыт.

– Оласе граждан ден водитель-шамычын ӧпкештым каласем. Тыгай шаргӱ деч нимогай пайда уке, – манын республик вуйлатыше.  – Кодшо ийлаште каткедылме кермычым шавыме. Тидат келге лакым петыркалаш ӱшанле йӧн огыл. Шошо пагытыште корным кӱчык жаплан шотыш кондаш йӧрышӧ гына. Чыным ойлаш гын, кызыт кодшо ийын олмыктымо корнышто гына кудалышташ лиеш. Молыштыжо – огеш лий. Ола рӱдыштат, ӧрдыжтат – чыла гаяк корно начар. Ты чырым кораҥдаш тендан деч шотан раш темлымашым вучем, – манын А.Евстифеев Йошкар-Олан мэрже Е.Масловлан.

Совещанийыште  республикым вуйлатыше муниципалитет кумдыклам шотыш кондымо йодышымат кӱлешан семын палемден коден. Районласе предприятий-влак шошым кудывечым, парк ден скверым, корно пеленсе кумдыкым йытыраен эрыкташ ямде лийшаш улыт манын палемден.

Марий Эл Республикым вуйлатышын организаций да

аналитике виктемын уверже-влак негызеш Р.ЧЕПАКОВА ямдылен.

Опубликовать в Одноклассники

Добавить комментарий