СПОРТ

Кок ший медаль

Шукерте огыл Уфаште пожарно-утарыше спорт дене «Россий МЧС-ын кубокшо» да «ЦС ВДПО-н кубокшо» всероссийский таҥасымашыже-влак эртеныт.

Башкортостанысе рӱдӧ олаш элнан тӱрлӧ регионжо гыч эн виян 12 команде миен, а тиде 350 спортсмен. Эн самырыкшылан -13 ий, эн илалшыжлан 45 ий лийын. Мероприятий Россий МЧС-ым ыштымылан 30 ий, Кугу Отечественный сарыште сеҥымылан 75 ий теммылан пӧлеклалтын.

Марий Эл гыч кугурак ийготан ӱдыр-влак тӱшкаште (17-18 ияш) Волжск оласе 5-ше №-ан школ гыч спорт мастерыш кандидат Дарья Попова шке вийжым терген. «Тӧрсыран полосаште» тудо кокымшо верыш лектын. Тыгак ӱдыр «Учебный башньын кокымшо пачашышкыже штурмовой тошкалтыш дене кӱзымаште» кокымшо верым сеҥен налын. Тидын дене тудо Российын спорт мастерже норматившымат эртен каен. Кок дисциплине дене Российын чемпионатыштыже ший медальым налмыже Дарья Поповалан пожарно- утарыше спорт дене Российын сборный командышкыже логалаш корным почын. Россий МЧС-н Марий Элысе Тӱҥ управленийжын личный составше спортсменкым да тудын тренерже, СССР спорт мастер Вадим Бурасовым, тыгай сеҥымаш дене саламлен да шумо кӱкшытеш шогалаш огыл тыланен.

 С.НОСОВА, В.БУРАСОВ.

 Снимкыште: Д.Попова.

 Фотом Россий МЧС-ын Марий Элысе

Тӱҥ управленийжын сайтше гыч налме

Опубликовать в Одноклассники

Добавить комментарий