УВЕР ЙОГЫН

Лӱдыкшӧ чакнен

Иокогама портыш пӧртылшӧ Diamond Princess круиз лайнер гыч Казаньыш, Профессор А.Ф.Агафонов лӱмеш республиканский инфекционный клинический больницыш, карантиныш кондымо турист-влакым мӧҥгышкышт колтымо.

Японийыш турист семын мийыше да коронавирус авалтыман лайнерыште лийше кандаш еҥым Татарстан Республикысе эмлымверыш 23 февральыште конденыт да лӱмын ямдылыме посна бокслашке вераҥденыт. Карантин жапыште нуным 12 медицине пашаеҥ эскерен да, тӱжваке лекде, пошкудо стационарыште илен. 8 мартыште больницыш Российын тазалыкым аралыме министрже Михаил Мурашко паша визит дене толын, тудо карантин мероприятийыште участвоватлыше медик-влаклан пашам кӱлын шуктымыштлан тауштен да кажныжлан ведомствын наградыже-влакым кучыктен.

Казаньыш коронавирусан кум пациентым эвакуироватлымеке, ынде мо лиеш манын, пошкудо кундемлаште илыше-влак кок арнялан пуйто шыпланышна да ынде, нунын лӱдыкшыдымӧ улмыштым, тӧрланымыштым пеҥгыдемдымеке, куштылгын шўлаштышна.

11 мартыште Тазалыкым аралыме тӱнямбал организаций коронавирусым пандемий – тӱнямбал чер – семын увертарен. Тыгайже айдеме тукымын историйыштыже улыжат кок гана лийын: 1918-1920 ийлаште «испанке» семын палыме H1N1 грипп да 2009-2010 ийлаште «сӧсна грипп» семын палыме H1N1 грипп шотышто.

12 мартлан тӱнямбалне коронавирус дене 126136 еҥ черланен, 4630 еҥ колен, 68216 еҥ тӧрланен. Российыште коронавирус дене черланыме 32 случайым регистрироватлыме, 6 пациентым эмлыме, колышо уке.

М.ИВАНОВА

Опубликовать в Одноклассники

Добавить комментарий