УВЕР ЙОГЫН

«Ший мундыра» йыр

Кодшо кугарнян республикысе Мер-политике рӱдерыште Марий Элысе Рӱдӧ юмыйӱла ушем «Ший мундыра» конференцийым эртарен.

Погынышо-влакым ончыч Марий оньыжа Эдуард Александров саламлен да сай мутланымашым тыланен. Каҥашыме тӱҥ йодыш онаеҥ-влаклан моткоч кӱлешан лийын. Тудо шнуй ото-влакым кугыжаныш кӱкшыт гыч аралыме дене кылдалтын. Кузе мемнан республикыште нуно аралалтыт да ты шотышто мо ышталтеш? Поснак кызыт чылаштым ик йодыш тургыжландара: тиде — «Марий Элын тӱвыраже 2013-2020 ий» кугыжаныш программе дене келшышын шнуй ото-влакын чекыштым палемдымаш. Ты шотышто онаеҥ-влакын шуко йодыш лектеш. Поснак кузе чодыра фондышто але верысе ял шотан илемыште улшо ото-влакын кумдыкыштым закон дене келшышын регистрироватлыман. Кызыт кугыжаныш шулдыр йымаке 327 отым налме да реестрыш пуртымо. Но нунын статусыштым пеҥгыдемдаш манын, кӱлеш семын оформитлыман. Ты шотышто онаеҥ-шамычлан Марий Элын Тӱвыра, савыктыш да калык паша шотышто министерствын Тӱвыра поянлык объект-влакым аралыме, пайдаланыме да оролымо шотышто пӧлкажат полышым пуа. Ты йодышым рашемдымаште республикысе Пӱртӱс поянлык, тыгак Ялозанлык да продовольствий министерствын специалистше-шамыч денат умылымашке шуыныт. Конференций годым ты пӧлкан вуйлатышыже Аурика Михеева ото-влакын кумдыкыштым кӱлеш семын оформитлыме шотышто ятыр сай каҥашым пуыш. Онаеҥ-влаклан ото шотышто могай корно дене кайышашым рашемдыш. А паша лектышыже лишыл жапыште лийшаш.

Конференцийыште каҥашыме вес йодыш республикыштына археологий памятник-влакым аралыме дене кылдалтын ыле. Онаеҥ-влак ончылно МарНИИЯЛИ-н тӱҥ шанче пашаеҥже, историй науко доктор Татьяна Никитина ойлыш. Кокла курымышто илыше марий-влакын пытартыш жапыште верештме тыгай памятник-влакым арален кодымо нерген йодышым тарватыш.

Марий юмыйӱла ушемын тӱҥ онаеҥже Александр Таныгин марий-влакын ик шнуйжо — Тӱрек Суртан — Вӱтла кугыза — нерген келгын палдарыше сай докладым ыштен. Тудым ушемын секретарьже Галина Ласточкина лудын пуэн.

Онаеҥ-влак тыгак ХI Марий калык погынлан ямдылалтме дене кылдалтше йодышым каҥашеныт. Вет тушто марий юмыйӱлам шыҥдарыме да вияҥден колтымо дене посна секций пашам  ышташ тӱҥалеш. Российысе регионла гыч толшо делегат-влакымат поснак ото-влакым регистрироватлыме йодыш шотышто палдараш да туныкташ кӱлеш. Сандене конференцийыште каҥашым чыла гаяк йодышым туштат тарваташ палемдыме.

 С.НОСОВА

 Авторын фотожо

Опубликовать в Одноклассники

Добавить комментарий