Финн-угор тӱнян тенийысе тӱвыра рӱдыверыштыже — Пошкырт кундем Мишкан селаште — «Ӱярня» пайрем кышкарыште «Марий патыр» конкурс эртен.
13 патыр да лӱддымӧ марий рвезе шкенжым ончыкташ кумылаҥын. Мутлан, эн самырыкше 16 ияш, эн илалшыже 69 ияш лийыныт. Но кажныже шкенжым чолган ончыктен да сеҥашак шонен.
Организатор-влак нунылан тӱрлӧ тергымашым ямдыленыт. Тӱҥалтыштак нуно чылан пырля рӱж «Тывырдыкым» куштеныт. Да туге, эсогыл ончаш толшо калыкымат тарватеныт.
Икымше тергымаште пӧръеҥ-влак пикш гыч умдо дене лӱйкаленыт. Южыжо пикш ден умдым икымше гана веле кидышке налын. Но саркурал дене мемнан кугезына-шамычак сонарыш коштыныт, сандене вӱрыштак, очыни, тудым кучаш да лӱйкалашат пеш писын тунемыныт.
Кокымшо конкурсышто патыр-влак шкеныштым презентоватленыт. Ойыртемалтшынрак палдарышыже, мутат уке, ончыко лектын кертын. Иктыже рэпым лудын, весе мыскара гоч каласкален, а кумшо куштымаш гоч шкенжым « почын» пуэн… Икманаш, марий патыр-влак кокла гыч кажыныже иктаж-мо дене ойыртемалтын. Участник-влакын ончылгоч колтымо визиткыштымат жюри аклен.
Конкурсын томжылан кумшо кужытым шотлыман: тушто рвезе-влак мастарлыкыштым, талантыштым ончыктеныт. Ончаш толшо-шамычат кажне участникым пеш шокшын вашлийыныт. Жюрин иктешлымашыжат нигӧн кумылжым волтен огыл. Кажныже посна номинацийыште сеҥышыш лектын:
- «Уста гармоньчо» – Артур Сайпанов (Балтач район);
- «Уста мурызо» – Байрам Бакиров (Краснокам район);
- «Кумылым савырыше» – Виталий Изиляев (Мишкан район);
- «Уста куштызо» – Вадим Байназов (Мишкан район);
- «Эн чолга» – Рамиль Мурзаханов ( Мишкан район);
- «Эн виян» – Афанасий Иликбаев (Краснокам район);
- «Эн чулым» – Тимофей Михайлов (Мишкан район);
- «Мут мастар» – Андрей Якупов (Мишкан район);
- «Пӱсӧ шинча» – Владимир Аптыкаев (Мишкан район);
- «Тале пикшызе» – Юрий Иксанов (Мишкан район).
Утларак ойыртемалтше кум марий патырым 1-3 стенян диплом дене посна палемденыт. Кумшо верыш Краснокам район гыч 61 ияш Вениамин Илинбаев, кокымшыш Мишкан район гыч 16 ияш Максим Андреев лектыныт. Эн «марий патырлан» Калтаса район гыч 38 ияш Андрей Петраевым шотленыт. Организатор-влак ты пайрем-конкурс поро йӱлаш савырна манын ӱшанат.
С.НОСОВА
Материалым Мишкан районысо тӱвыра
полатын сайтше негызеш ямдылыме
