СПОРТ

У МАНЕЖЫШТЕ ИКЫМШЕ ГАНА

24 январьыште Йошкар-Оласе «Арена» манежыште ветеран-спортсмен-влак куржталын таҥасеныт. Тушко тыгак икмыняр район гыч куштылго атлет-шамыч ушненыт.

Таҥасымаш спорт журналист, футбол да хоккей арбитр Сергей Даниловым шарныме лӱмеш эртен.  Тудо ынде йӱлаш пурен. Организаторжо – таза илыш-йӱлан таҥже В.Горохов. Валерий Ефимович шкежат ты кечын лӱмгечыжым тазалык корнышто вашлийын.

– Ончыч тыгай сынан куржталмаш уремыште лийын гын, тений икымше гана «Арена» манежым ойыреныт. Тидланже моткоч кугу тау, – ойла В.Горохов. – Тыге ыштыме дене ме эше самырык тукымлан пример семын лийына. Куштылго атлетикым илышыш шыҥдарыме, тудым пропагандироватлыме да илыш гыч кайыше-влакым шарныме шотышто сай паша, шонем.

Талын куржталмаште ийготым шотыш налын, шке тӱшкаштышт Вера Замкова (Курыкмарий район), Вера Ягодарова (Йошкар-Ола), Вячеслав Чемеков (У Торъял), Валерий Романов (стайер, Морко район), Валерий ден Евгений Гороховмыт (Йошкар-Ола) ончыко лектыныт.

Тыгак ты таҥасымаште СДЮШОР-ын да УОР-ын воспитанникше-влак вийыштым тергеныт. Нунын коклаште 600 метр кужытышто Глафира Стукова (СДЮШОР) ден Никита Чирков (УОР) сай результатым ончыктеныт. Пӧръеҥ-шамыч коклаште Николай Иванушкин («Межрегионгаз» команде) ойыртемалтын.
Автор статьи: Эшкинина Е.Е.

Опубликовать в Одноклассники