КРАЕВЕДЕНИЙ

Курымаш лӱмгече вашеш

1920 ий 4 мартыште Калык образованийын Краснококшайскысе уездный пӧлкаже  Краснококшайскыште Рӱдо тоштерым почаш пунчалын… Лач тиде кече гычак  Т.Евсеев лӱмеш калыкле тоштерын историйже тӱҥалын.

 А эртыше кечылаште тудын пашаеҥже-влак Россий Президент В.Путин деч тоштерлан 100 ий темме дене саламлымашан телеграммым налыныт.  Кугыжаныш вуйлатыше республикыштына илыше калык-влакын историйыштым аралыше поян материалым ятыр ий дене чумырен толмо лектышан пашаштым палемден. Тоштерын тачысе коллектившын шымлымаш, образовательный, просветительский проектше-влакым илышыш сайын  шыҥдарымыжым кӱлешанлан шотлен да ончыкылан чыла шонымашке шуаш тыланен.

Тидын деч ончыч ты тоштерын ик филиалыштыже – Историй да археологий тошерыште – «Музейный мир Марий Эл» книган презентацийже эртен. Ты савыктыш, мӧҥгӧ гыч лекде, республикысе чыла тоштер дене палыме лияш йӧным почын. Книган презентацийже республикысе тоштер пашаеҥ-влакын семинарышт кышкарыште лийын. Тушто нуно кодшо ийысе пашаштым иктешленыт да ончыкылан планым палемденыт.

У книга «Марийская земля – очарование России» кум томан савыктышын икымше ужашыже манаш лиеш. Тоштер-влакын ышталтмышт, вияҥмышт, нунын поянлыкышт дене палдара. Лудшо тушеч шуко уым пален налын кертеш: кызыт могай экспозиций-влак ончыкталтыт, тоштер-влак мо дене ӧрыктарен кертыт, фондышт могай… Книган авторжо-влак историй науко кандидат Анатолий  Муравьев ден Т.Евсеев лӱмеш калыкле тоштерын редакционно- издательский пӧлкажым вуйлатыше Надежда Соловьева улыт.

 С.НОСОВА

Опубликовать в Одноклассники

Добавить комментарий