ОБРАЗОВАНИЙ

Иканаште кум книга

16 майыште Т.Евсеев лӱмеш национальный тоштерыште  Марий кугыжаныш университетын лӱмлӧ историкше-влак, историй науко доктор, профессор-влак Ксенофонт Никанорович Сануков ден Ананий Герасимович Ивановын книга презентацийышт лийын. Нуно «Марий Элын историйже: тунемме пособий», «ХIХ курым кыдалсе источниклаште Марий Элыште илыше калыкын историйже ден культуржо», «ХVIII курым тӱналтышысе источниклаште традиционный курыкмарий еш-влак»  книгашт дене палдареныт.

Ты савыктыш-влакым лукмо дене историй науко ончыко эше ик ошкылым ыштен манын каласаш лиеш. А.Ивановын «ХVIII курым тӱналтышысе источниклаште традиционный курыкмарий еш-влак» пособийыштыже шуко исторический фактым авторитетный тӱрлӧ источникла гыч чумырымо. Книга студент, аспирант да преподаватель-влаклан пайдале лийшаш. Тиражше — 1 тӱжем экземпляр. «ХIХ курым кыдалсе источниклаште Марий Элыште илыше калыкын историйже ден культуржо» книгам Руш географический обществын архивыштыже аралалтше материал-влак негызеш возымо.

— 1701, 1702 ийласе серышлам, 1717  ийысе  еш переписьым шымлыме. Переписьыште курыкмарий нергенат серен кодымо. Кид дене возен кодымо 800 лышташан  акрет славян текстым кызытсе руш йылмыш кусарыме. Серыш-влаклан 300 ий эртен. А чылажат аралалт кодын. Тушеч пале: тунам чыланат тынеш пурышо лийын огытыл. Тиде серышла гыч марий-влакын еш илышышт, мыняр йоча лиймышт,  мыняр ясакым тӱлышашт нерген возымо, — мане А.Иванов.

Презентацийыште шанчызе-влакым тӱвыра, печать да калык-влакын пашашт шотышто министрын алмаштышыже Александр Луничкин, книга-влакын рецензентышт профессор Геннадий Айплатов, Курыкмарий землячествын еҥышт,  Марий книга издательствын пашаеҥже-влак саламленыт.

М.СКОБЕЛЕВ.

Авторын фотожо.

Снимкыште:  Книга презентаций годым.

Опубликовать в Одноклассники

Добавить комментарий