Тений теле тургым ечызе-влакым пешыжак куандарен огыл гынат, Марий Элыште, посна районлаште, таҥасымаш-влак эртаралтыныт, кызытат эше палемдалтыт. Мутат уке, кажне кундемыште ойыртемалтше стартыш лектыт. Тений лум молгунамсе деч шагалрак ыле, сандене тренер, организатор-влак ече дене таҥасымашым эртарыме годым нелылыкым шижыныт. Тургыжланашат логалын, вет спортсмен-шамычлан кӱлеш семын ямдылалташ йӧн сайжак лийын огыл.
Мутлан, февраль кыдалне Кужэҥер районышто «Марий Швейцарий» кундемыште (Визым ялыште) ветеран ечызе-влак коклаште таҥасымаш лийын. Тудо тыгак Афганистан гыч Совет войскам лукмылан 31 ий теммылан пєлеклалтын. Шуко спортсмен салтак радамым эртен, южышт локальный сарлаште кредалыныт. Мутат уке, службышто спорт дене кылым кучышо-влаклан куштылгырак лийын.
Ты таҥасымашке республикнан тӱрлӧ кундемже гыч ятыр ечызе, ты видым йєратыше-влак чумыргеныт. Тыге ечыгорныш лекше ветеран-шамыч шке чолгалыкышт, таза илыш-йӱлам кучымышт дене самырык тукымлан эреак пример улыт.
Тўшкам шотыш налын, шке коклаштышт Сергей Майоров (Юбилейный), Евгений Смирнов (Медведево), Марат Ганиев (Волжск), Геннадий Макаров (Шернур), Вениамин Хмелев (Морко), Валерий Романов (Морко), Александр Зайцев (Шернур), Светлана Лазарева (Шернур), Галина Лебедева ( Йошкар-Ола) икымше лийыныт.
Таҥасымаш деч вара кажне команде художественный номер дене куандарен. Гармонь почеш сылне марий мурым муреныт, кушталтеныт. Кумылан-влак шокшо мончашкат пурен лектыныт. Организатор-шамыч спорт пайремыш тыгай шкешотан сыным пуртеныт.
– Мый чыла вере лияш тыршем. Молым ужын кутыралташ, шке вийым тергаш, яндар южышто лияш – моткоч сай йӧн. 23 февральыштат «Корта» учебно-тренировочный базыште тренер, тале спортсмен-влакым шарныме лўмеш «Ме шарнена, кугешнена!» таҥасымаштат вием тергенам. Моткоч келшен. Лўмлє ечызе, ветеран-шамыч дене пырля таҥасенам. Тау организатор-влаклан, сай спорт мероприятий-влакым эртарымыштлан, – ойла Шернур район гыч таза илыш-йӱлам кучышо, куржталаш йӧратыше Л.Веткина.
Е.ЭШКИНИНА
