Марий Эл Кугыжаныш Погынышто
«Кандидатурем темлаш тӱҥалам»
Теҥгече, 18 майыште, Ю.Минаковын вуйлатымыж почеш Йошкар-Олаште Марий Эл Республикын кудымшо созыв Кугыжаныш Погынжын коло кудымшо сессийже эртен. Тушто Марий Эл вуйлатышын обязанностьшым жаплан шуктышо А.Евстифееват лийын.
– Ме калыкын кумдан палемдыме 9 Май пайрем деч вара икымше гана погыненна, сандене тудым ямдылаш да эртараш полшышо чыла еҥлан таче таушташ шотлан толеш, – сессийым саламлен манын Александр Александрович. – Награде-влак шотышто комиссийна Сеҥымаш кечылан пӧлеклалтше мероприятийлаште пашам сайын да моштен шуктышо граждан-влакым палемдаш ямдылалтеш.
Тылеч посна А.Евстифеев Марий Эл Правительствын у вуйлатышыже-влак: Марий Эл Республикын министрже-Вуйлатышын полномочный представительже С.Трухин, ялозанлык да продовольствий министр Ю.Сидыганов, образований да науко министр Н.Адамова – дене палдарен.
Депутат-влак Марий Эл вуйлатышын обязанностьшым жаплан шуктышын ялозанлык да продовольствий, образований да науко министр-влакын должностьышкышт темлыме кандидатур-влак дене келшеныт.
Федеральный законодательстве дене келшышын, «Марий Эл Республик вуйлатышым сайлыме нерген», «Марий Эл Республикыште верысе кучемлашке сайлыме нерген» да «Марий Эл Республикын Сайлыме рӱдӧ комиссийже нерген» закон-влакым онченыт.
Икымше законыш сайлыме посна процедурым регулироватлыме рашлык (тӧрлык), тыгак жап деч ончыч йӱклымӧ да открепительный удостоверений дене кылдалтше вашталтыш-влакым пуртеныт.
2017 ий сентябрьыште Марий Эл Республик вуйлатышым жап деч ончыч да сайлыме кок округышто Кугыжаныш Погын депутат-влакым ешарен сайлаш кӱлмылан кӧра «Марий Эл Республикын 2017 ийлан да 2018-2019 ий-влаклан бюджетше нерген» законыш нине цельлан средствам ойырымо шотышто вашталтышым пуртеныт. Палемдыме мероприятий-влакым бюджет роскотым подраздел-влак коклаште угыч шеледыме кӱшеш эртараш, 2017 ийын бюджетшым вашталтыде кодаш ыштыме.
Депутат-влак чылаже 12 йодышым онченыт, Марий Эл Республикын 8 законжым да Кугыжаныш Погынын 12 пунчалжым приниматленыт.
* * *
Тидын деч вара А.Евстифеев журналист-влаклан интервьюм пуэн. Республикын правительствыштыже кадр шотышто ончыкыжат вашталтыш лийшашым тудо тыге палемден: «Таче регионысо калык чыла гаяк ведомствын пашажым вурса. Кадрым вашталташ кӱлмӧ йодыш трукышто лектын огыл, тудо кужун формироватлалтын. Ты направлений дене пашам умбакыжат шуена».
Таче шуко еҥ ик йодыш дене ила: Александр Евстифеев Марий Эл Республик вуйлатышым сайлымаште участвоватлаш тӱҥалеш мо?
– Ик тылзе утларак пашам ыштыме жапыште республикын положенийжым кӱлынак лончылышым. Каласен кертам, регионын ончыкылык вуйлатышыжын ыштышаш пашажым сайын ужам. Тидымат ушештарынем: мый тидын дене кугешнем, мый Марий Эл Республикыш Россий Федераций Президентын специальный указше дене делегироватлалтынам. Тичмаш налмаште, ты указ мыланем республикыште социально-экономический ситуацийым саемдаш кӱшта. Шукертак мондымо, кудалтыме позицийым, мутлан, корно да тудым чоҥымо качествым, иканаште саемдаш огеш лий. Тиде – ончыкылык паша, тудым сайлымаште ӱшаным ыштыме вуйлатыше гына ыштен кертеш. Сандене шинчашкыда ончен ойлем: да, шке кандидатурем темлаш тӱҥалам, – вашештен А.Евстифеев.
М.ИВАНОВА.
