МАРИЙ ТӰНЯ

«Марий патыр»

Финн-угор тӱнян тенийсе тӱвыра рӱдыверыштыже — Пошкырт кундем Мишкан селаште — «Ӱярня» пайрем кышкарыште «Марий патыр» конкурс эртен.

13 патыр да лӱддымӧ марий рвезе шкенжым ончыкташ кумылаҥын. Мутлан, эн самырыкше 16 ияш, эн илалшыже  69 ияш лийыныт. Но кажныже шкенжым чолган ончыктен да сеҥашак шонен.

Организатор-влак нунылан тӱрлӧ тергымашым ямдылыеныт. Но ончыч нунын дене палдареныт, а тидын деч вара чылан пырля рӱж «Тывырыдыкым» куштеныт. Да туге, ончаш толшо калыкымат тарватеныт.

Икымше тергымаште пӧрьеҥ-влак пикш гыч умдо дене лӱйкаленыт. Южо иктыже пикш ден умыдым икымыше гана веле кидышке налын. Но  саркурал дене мемнан кугезына-шамычак сонарыш коштыныт, сандене вӱрыштак, очыни, тудым кучаш да лӱйкалашат пеш писын тунемыныт.

Кокымшо конкурсышто патыр-влак шкеныштым шке презентоватленыт. Ойыртемалтшынрак палдарышыже, мутат уке, ончыко лектын кертын. Иктыже рэпым лудын, весе мыскара гоч каласкален, а кумшо куштымш гоч шкенжым « почын» пуэн… Икманаш, марий патыр-влак кокла гыч кажыныже иктаж-мо дене ойыртемалтын. Участник-влакын ончылгоч колтымо визиткыштымат жюри аклен.

Конкурсын томжылан кумшо кужытым шотлыман: тушто рвезе-влак шкеныштын мастарлыкыштым, талантыштым ончыктеныт. Ончаш толшо-шамычат кажне участникым пеш шокшын вашлийыныт. Жюрин иктешлымашыжат нигӧн кумылыжым волтен огыл. Кажныже посна номинацийыште сеҥышыш лектын:

  1. «Уста гармоньчо» – Артур Сайпанов (Балтач район);
  2. «Уста мурызо» – Байрам Бакиров (Краснокам район);
  3. «Кумылым савырыше» – Виталий Изиляев (Мишкан район);
  4. «Уста куштызо» – Вадим Байназов (Мишкан район);
  5. «Эн чолга» – Рамиль Мурзаханов ( Мишкан район);
  6. «Эн виян» – Афанасий Иликбаев (Краснокам район);
  7. «Эн чулым» – Тимофей Михайлов (Мишкан район);
  8. «Мут мастар» – Андрей Якупов (Мишкан район);
  9. «Пӱсо шинча» – Владимир Аптыкаев (Мишкан район);
  10. «Тале пикшызе» – Юрий Иксанов (Мишкан район).

Утларак ойыртемалтше кум марий патырым посна 1-3 степнян диплом дене палемденыт. Кумшо верыш Краснокам район гыч 61 ияш Вениамин Илинбаев, кокымшыш Мишкан район гыч 16 ияш Максим Андреев лектыныт. Эн «марий патырлан» Калтаса район гыч 38 ияш Андрей Петраевым  шотленыт. Организатор-влак ты пайрем-конкурс поро йӱлаш саврына манын ӱшанат.

С.НОСОВА

Фотом Мишкан районысо

тӱвыра полатын сайтше гыч налме

Опубликовать в Одноклассники

Добавить комментарий