ЙӰЛА

Ӱяча ден Мелна толыныт унала

Ӱярня пайрем Шорыкйол деч шым арня вара эртаралтеш. Таклан огыл шомакшат кок мут гыч шога – «ӱй» да «арня».  Шошо пушан ӱян мелна осо арня мучко ӱстел оза лиеш. Ожно пайремыште телым ужатыме дене пырля чыла осалым, ойгым, єпкем луктын кудалтеныт. Ты йӱла  таче мартеат аралалт кодын. Вет Ӱярня, телым мучашлен, мотор шошым конден.  Поянлык лийже, шурно сайын шочшо манын, Ӱярня кувам ыштеныт. Мотор, ару вургемым чиктен, ял гыч пасугапка деке ужатеныт. Кече шичмеке «Ӱярня каен» манын  кычкырен йӱлалтеныт. Тул коймо дене Ӱярня кува осал деч арала манын ӱшаненыт. Ломыжшым шурно пасуш кышкеныт.  

Тений Ӱярня пайрем пургыж тылзын 29 кечынже Волжский район Пєтъял школышто эртаралтын. Волгыдо чон дене Ӱярня пайрем уна, пошкудо, родо-влакым иктыш ушен. Шошо толмо шижмаш чоным кече гае ырыктен. Йырваш пайрем шӱлыш, тутло мелна пуш да самовар шикш озаланеныт. Пайремыш мийыше шергакан уна-влакат: Марий Эл Республикын Кугыжаныш Погынын депутатше-влак Лариса Яковлева ден Наталья Пушкина, «Волжский муниципальный» район муниципальный образованийым вуйлатыше Владимир Сергеев, Волжский район ял шотан илемым вуйлатыше Геннадий Романов – йоча, туныктышо да ончаш толшо калыкым пайрем дене шокшын саламленыт.

– Кунам мален кийыше шошо тарвана, помыжалтеш, марий-влак Ӱярня пайремым эртареныт, осалым поктен колтеныт. Ты кечын курык гыч мунчалтеныт. Кунар умбакрак мунчалтен кает, тунар ӱмырет кужу лиеш маныныт. Имне дене кудалыштыныт, мелнам кӱэштыныт, унала коштыныт да тынар чот куштеныт, тидын дечын вара ны вурседылаш, ны ӱчашаш вийышт кодын огыл. Садлан поро кумыл дене ваш келшен илаш тыршеныт, – ойлен Наталья Пушкина.

Лариса Яковлева марий ӱдыр-рвезе-влакын марий пайремым, йӱлам палымыштлан да аралымыштлан кугешнен тауштен.

Пайремыш тутло Ӱяча (Рауль Гарифулин) да шокшо тулеш чевергыше Мелна (Эльвира Петрова) толыныт. Тӱрлӧ районысо школла гыч ушнышо ӱдыр-рвезе-влак нуным куанен вашлийыныт. Тиде Морко район Унчо школ, Коркатово лицей, Волжский район Кугу Корамас, Обшияр, Сотнур, Карай школла, Советский район Ӱшнӱр школышто тунемше-влак. Пайремын ик ужашыже Пӧтъял  школышто эртаралтын. Тушто школ команде-влак «Марий йӱла»   квест-модмаш дене модыныт.  Ӱярня мелналан презентацийым эртареныт. Р.В.Короткова уна-влакым шудо чай дене сийлен. Школышто тунемше ӱдыр-рвезе-влакын шке ыштыме ӱзгарыштым поян ончерыште ужаш лийын. Вес ужашыже – уремыште. Салмавондо, ече, вӱдвара дене ӱчашымаш да моло модмаш-влак кумылым савыреныт. Кажне команде Ӱярня кувам ыштен конден да тудым калык ончылно арален.  Нуно ару да мотор веле огыл лийыныт, лўмыштат сылнын йӧҥгалтын: Лумчинче, Алкече, Унчовий да молат.

«Марий йӱла» квест-модмаште Советский район Ӱшнӱр школ ойыртемалтын. Нуно икымше верыш лектыныт. Кокымшо вер дене Морко район Унчо школын командыже палемдалтын. Кумшо верым пайремын озаже Пӧтъял школ налын.   

«Калык модмаш»: 1-ше вер – Унчо школ, 2-шо вер – Волжский район Карай школ, 3-шо вер – Волжский район Упшер школ.

«Ӱярня кува»:  1-ше вер – Унчо школ, 2-шо вер – Морко район Коркатово лицей, 3-шо вер – Кугу Корамас школ.

«Ӱярня мелна»  таҥасыште Пєтъял школын мелнаже эн тутло лийын. Унчо школышто тунемше-влак Ӱярня годым ямдылыме кочкыш-влак дене сийленыт. Сотнур ӱдыр-рвезе-влак Вӱргече мелнам конденыт.

Сценарий конкурс:  1-ше вер – Пєтъял кыдалаш школын туныктышыжо  Н.А.Самосадкина, 2-шо вер – Унчо школын туныктышыжо  Л.К.Игнатьева, 3-шо вер – Звенигово район Шолеҥгер «Родничок» йочасадын воспитательже А.В.Матвеева.

                                                                                                                   Е.ИВАНОВА

Опубликовать в Одноклассники

Добавить комментарий