СПОРТ

Таҥасымаш умбакыже шуйна

Марий Эл гыч тале ечызе Е.Смирнова элнан кубокшо верч таҥасымаште икымше верым сеҥен налын. Тудыжо Архангельск областьыште 26 февраль -1 мартыште лийын. Марий ӱдыр (кызыт тудо Тюмень областьын, тыгак Марий Элын чапыштым арала) 10 километрым эрыкан йӧн дене эртен. Алена Перевозчикова тудын деч куд секундлан почеш кодын. Кумшо верыште – Марина Черноусова.

А 1 мартыште землячкына Финляндийыште тӱнямбал кубок верч таҥасымаште, эстафетыште вийжым терген. Тудо кумшо этапыште куржын. Тыште, элнан ӱдырамаш сборныйжым мокталтыме шуэш. Нунын деч иктат тыгай сай результатым вучен огыл, манашат келшен толеш, но… Командын призёр радамыш лекташат йӧнжӧ улмаш. Икымше этапыште Н.Непряева куржын, лидер-влак тӱшкаште лийын. Кокымшо этапыште А.Жамбаловалан таҥасаш нелырак лийын, а кумшо ик эн тӱҥ семын шотлалтын. Тушто призёр-влак моткоч писын вашталтыныт. Лач кумшо этапыште мемнан  Екатерина Смирнова куржын. Тудо эсогыл результатым пел минутлан саемден. Тыге иктешлыше этапыш Я.Кирпиченко кумшо куржын. Финал марте ечызе шке вержым пеҥгыдын кучаш тыршен, но, чаманаш гына кодеш, пытартыш метрыште Яна шведкылан сеҥалтын.

Моткоч кумыл волтышо мучаш. Финиш деч вара ечызе, чытен кертде, шортын колтен, а тудым ончылтышо опытан  шведке Далквист лумышто тарваныде киен. Векат, чыла вийжым ечыгорнеш коден. Икымше верыш Норвегийын, кокымшыш Финляндийын, кумшыш Швецийын командышт  лектыныт. Россий кумыл волтышо нылымше верыш лектын. Элнан кокымшо командыже шымше лийын.  

Лишыл жапыште Е.Смирнова Норвегийыште тӱнямбал кубок верч таҥасымаште черетан этапыштыже вийжым терга, а вара Российын чемпионатшылан ямдылалташ тӱҥалеш.

Чемпионат Тюменьыште 27 март гыч 5 апрель марте шуйна. Екатериналан пиалан ечыгорным тыланена.

Е.ЭШКИНИНА

Опубликовать в Одноклассники

Добавить комментарий