Эртыше кечылаште Правительстве пӧртыштӧ Марий Эл Кугыжаныш Погынын визымше депутат кечыже эртыш.
Мероприятий тӱҥалтыштак Кугыжаныш Погын председатель А.Смирнов мутым Марий Элын прокуроржо С.Беляковлан пуыш. Сергей Геннадьевич, кодшо ийым иктешлен, Республикыште закон кузе шукталтме да правам кузе эскерыме нерген докладым ыштыш.
Тудо прокурор-шамычын пашаште кучем орган-влак, правам аралыше да контрольышто кучышо ведомство дене пеҥгыде кыл улмо нерген палемден кодыш. Умбакыже прокуратур органын тӱҥ направлений-влак дене ыштыме паша лектыш дене радамлын палдарыш.
С.Беляков палдарымыж почеш, кодшо ийын прокуратур органыш еҥ-влак деч 18 тӱжем утла йодмаш пурен. Тидыже ончылий дене таҥастарымаште 15 процентлан шукырак. Тышечын 6,7 тӱжемжым ончен лекме, 2,5 тӱжем утла йодмашым мучаш марте шуктымо, 2 тӱжем утла искым судыш колтымо. Йодмашын икмыняр ужашыжым моло ведомствышто тӱҥге-вожге уэш ончал лекташ темлыме.
Эртыше ийыште 16,5 тӱжем утла закон пудыртымашым пален налыныт да 4 тӱжем утла искым судышко колтеныт. Прокурорын темлымыж почеш, ӱмаште 4790 еҥым дисциплинарно да 1580 административно мутым кучаш шогалтыме. Тыгак 190 материалым уголовно шымлыме шотышто рашемдаш колтымо. Прокурор-шамычын материалышт негызеш 131 уголовный делам тарватыме.
Регистрироватлыме преступлений-влакын, поснак нелылан шотлалтше палынак шукемын манын палдарен кодыш. Тӱҥ шотышто «Интернет» кыл дене пайдаланен, банк карт гыч оксам ондалкален налме случай-влаклан кӧра тыгай преступлений-влак ешаралтыт.
Республикыште ийготыш шудымо икшыве-шамычым преступлений корныш шупшылын, наркотикым, спайсым, шупшмо тӱрлӧ вартышым, снюсым шаркалаш ондалкален ушымаш шукемын.
Правам аралыме паша дене кылдалтше тыгай йодыш-шамычым: пашадарым жапыштыже тӱлыдымым, инвалид, тулык йоча-влакын праваштым аралыме да тудым уэш тӧрлатымым, граждан-влаклан эмым ситарыме да моло кӱлешан йодышым прокурор-влак эре терген шогат.
Олаште тӱрлӧ вере илыше-шамычын ик гана веле огыл йодын возымыштым шотыш налын, МВД пашаеҥ-влакын тергымышт деч вара спиртан йӱышым ужалымылан кӧра лӱдыкшым лукшо 42 торгайыше точкышто ӱмаште аракам ужалаш чарыме, южо верым петыраш логалын.
Депутат кечын программыж дене келшышын, Россий Федераций следственный комитетын Республикысе управленийжын ӱмаште ыштыме пашажым ты ведомствым вуйлатыше А.Мигушов иктешлыш. Тудат управленийын пашажым раш ончыктышо цифр-влак дене палдарыш. Кодшо ийын ты управленийыште тыршыше 40 следователь преступленийым ыштыме нерген 3 тӱжем йодмашым шымлен лектын. Чылажге 700 утла уголовный делам тарватыме. Тергыме деч вара 551 делам (90 наре процентшым) судыш ончаш пуымо манын каласыш. Ончыч пегыдемден кертдыме 149 преступленийым уэш ончен лектын, йодышым чын тарватымылан шотлымо.
Тылеч посна А.Мигушов следственный управленийын технике дене пойдаралтмыжым палемден кодыш. Трудовой законодательстве сферыште профилактике пашам эртарыме, ийгот шудымо икшыве-шамычым преступлений корныш шупшылмо деч арален шогымо да граждан-влак дене пашам ыштыме нерген ойлыш.
Р.ЧЕПАКОВА
