УВЕР ЙОГЫН

Сарым карген, тыныслан тауштен

Звенигово межпоселенческий библиотекыште Шочмо йылмын тӱнямбал кечыжлан да Кугу Отечественный сарыште сеҥымылан 75 ий теммылан пӧлеклалтше «Сар нерген шарнымаш» сылнымут произведенийым лудмо конкурсым эртарышна.

…Кöн рвезе ÿмыр, лугыч тодылт,

Илен шуде, тушакын кодо,

Пытартышлан мом нуно йодыч, –

Монден огына керт нигунам:

– Таҥ-влак! Моткоч огеш шу колымо!

Мемнан верч илыза геройлын,

Сеҥен лекмеке, мöҥгö толын,

Шарналтыза коклан мемнам…

Анатолий Бикын возымо тиде корнылажым лудмеке, шочмо элнан кажне патыржым шарналтен, мыланна тыныс кавам пӧлеклымыштлан тауштен, вуйнам савышна.

Пайремышкына марий калык писатель Н.Лекайнын ӱдыржӧ – Нина Никандровна – тольо. Тудо, ачажым порын шарналтен, погынышо-влакым Никандр Сергеевичын сар деч варасе илышыж дене палдарыш.

Провой вел калык ты ганат конкурсыш рӱж ушныш. Тӱҥжӧ – кажныже шочмо йылмым пала да пагала. Шке мастарлыкшым 35 еҥ ончыктыш, тышечын 26 участникше – школышто тунемше-влак. Эн изи лудшына Даша Матвеева Кожласола йочасадыш веле коштеш гынат, колыштшо-влакын кумылыштым садак савырен керте.

Сылнымут произведенийым лудшо южо еҥ мастарлыкше дене ойыртемалтак: 1-4 класслаште тунемше-шамыч коклаште – Мария Орлова (Эсмекпляк школ), Илья Данилов (Красногорский посёлкысо 2-шо №-ан кыдалаш школ), Анастасия Малышкина (Чакмарий школ), Антон Озеров (Чакмарий школ), Валерия Верина (Эсмекпляк школ), Полина Судакова (Чакмарий школ); 5-9 класслаште тунемше-влак коклаште – Елена Дубовникова (Эсмекпляк школ), Данил Степанов (Звенигово оласе 1-ше №-ан школ), Татьяна Гусарова (Эсмекпляк школ), Арсений Ванюшков (Звенигово оласе 1-ше №-ан школ), Диана Николаева (Шолэҥер школ).

Кугыеҥ-влак коклаште Вера Азинова, Роза Судакова, Тамара Семёнова сеҥышыш лектыч.

«Сар нерген шарнымаш» конкурсыш ушнышо кажне еҥ мероприятийын темыжлан да шке чонжылан келшыше сылнымут произведенийым ойырен налын.  

…Жап эртыме семын илыш вашталтын толеш, моло семын мемнан кундемыштат руш йылмын «озаланаш» тӱҥалмыже шижалтеш. Но Провой кундемын чолга еҥже-влак шочмо йылмым араленак кодаш тыршат. Теве, мутлан, тиде пайремыштат марий йылме тунар сылнын да лывыргын йоҥген!

Надежда БОЯКОВА

Звенигово район

Опубликовать в Одноклассники

Добавить комментарий