20 февральыште Кугыжаныш Думын депутатше-влак пленар заседанийыште пытартыш кумшо лудмаште ава капиталын программыжым кумдаҥдыме нерген законыш пуртымо вашталтышым пеҥгыдемденыт.
«Тиде Россий Федераций Президентын посланийжым илышыш пуртымо кышкарыште кӱлешан тӱҥалтыш гыч иктыже. Элым вуйлатыше тугай задачым шынден, кудо 2020 ий 1 январь гыч шочшо йочан еш-влаклан полшымашке виктаралтын. Ме тиде йодышым закон дене пеҥгыдемдышна. Вашталтыш дене келшышын, икымше йочалан кугыжаныш 466 617 теҥгем ойыра. Кокымшо йочам ыштымылан ава капитал 150 тӱжем теҥгелан кугемешш да чумыржо 616 617 теҥге лиеш. Тиде законым калык вучен», – манын Кугыжаныш Думын председательже Вячеслав Володин.
Законын проектше почеш, элым вуйлатышын кӱштымашыж дене келшышын, ава капиталын программыже 2026 ий марте шуйна. Тылеч посна, самырык еш-влаклан полышым пуымо процедур простарак лийже манын, сертификат ден оксам пуымо жапым кӱчыкемдыме.
19 февральыште Кугыжаныш Думыш федеральный бюджет ден Пенсий фондын бюджетшым 2020-2022 ий-влаклан тӧрлатыме нерген законын проектшым колтымо.
М.ИВАНОВА
