УВЕР ЙОГЫН

Йоча шочын, окса ок сите гын…

Марий Элыште «Демографий» национальный проектын «Йоча шочмо годым ешлан финанс велым полшымаш» региональный проектше илышыш умбакыже пурталтеш.

Тений январьыште икымше йочалан тылзе еда тӱлыман окса выплатым 1900 еш налын. Тиде роскот 19,5 млн. теҥгеш шуын. Ӱмаште тыгаяк выплатым 1400 ешлан пуымо да тидлан 14,4 млн. теҥгем кучылтмо.

Палемдыман, 2020 ий 1 январь гыч льгото дене пайдаланаш лийме жапым икшывын 3 ийым темымешкыже шуйымо да тӱнен илымым ончыктышо йыжыҥламат ешарыме. Кызыт тыгай выплатым ешын доходшо ик еҥлан шотлымаште 20996 теҥге (пашам ыштен кертше гражданинлан ик тылзыште илен лекташ кӱлмӧ окса кугытым кок пачаш деч шуко огыл налме годым) деч шагалрак лекме годым 2018 ий 1 январь деч вара шочшо йочан кажне ешлан тылзе еда тӱлат, тудын кугытшо – 10066 теҥге.

Икымше йоча шочмо (але тудым эргылыкеш/ ӱдырлыкеш налме) шот дене тылзе еда тӱлыман выплатым палемдыме нерген йодмашым икшывын шочмо кечыж гыч кум ияш лиймешкыже пуаш лиеш.

 Йодмашым йоча шочмо деч вара пел ий жапыште пуымо годым оксам икшывын шочмо кечыж гычак тӱлат, тылеч вара – йодмашым пуымо кече гыч.

У вашталтыш дене келшышын, пособийлан правам кажне ийын пеҥгыдемдыман: ончыч – йочан 1 ийым темымешкыже. Тиде жап эртымек, выплатым палемдыме нерген у йодмашым икшывын 2 ияш лиймешкыже пуат, вара – кум ийым темымешкыже.     

Кӧн шочшыжо 2019 ийыште 1,5 ийым темен, да выплатым тӱлымым чарныме, тудо 2020 ий гыч тиде права дене угыч пайдаланен кертеш. 

2019 ийыште ешын доходшо выплатым налашлан правам пуэн огыл гын, тений тудым палемдыме нерген йодмашым угыч пуаш лиеш.

Икымше йоча шочмо шот дене тылзе еда тӱлыман выплатым палемдыме нерген йодмашым илыме кундемысе калыклан социальный полышым пуымо рӱдерыш але республикыште улшо шуко функциян кеч-могай рӱдерыш пуыман.

М.ИВАНОВА

Опубликовать в Одноклассники

Добавить комментарий