20 февральыште Шернурышто Мер Каҥашын районысо конференцийже эртен. Тушко 140 марий чумырген. Погынымашым Мер Каҥашын еҥже Августа Швецова вӱден.
Марий мер пашам шуктышо йолташыже-влакым Шернур районысо «Марий кумалтыш» общиным вуйлатыше Вячеслав Мамаев сугынь мут дене вашлийын. Тудын шочмо калыкнан ончыкылыкшо верч ыштыме пашаште ик ой дене пунчалым лукташ сай серлагышым, аралтышым йодын пелештымыже волгыдо кумылым ылыжтен. Шернур район миниципальный образованийым вуйлатыше Сергей Адиганов, саламлыме мутым ойлышыжла, чылажымат поро ой-каҥаш дене шукташ тыланен да районысо «Марий кумалтыш» общенын еҥже-влаклан Игорь Антропов ден Сергей Чемековлан Тауштымашым кучыктен.
Мер активын ныл ияш пашаж дене Августа Николаевна ден район администрацийын образований да самырык-влакын пашашт шотышто пӧлкажым вуйлатыше Людмила Смирнова палдарышт. Тидын нерген ме Мер Каҥаш вуйверын Кукнурышто эртыше заседанийже гыч репортажыште (24 январьыште лекше номерыште) почын пуэнна ыле. А ял калыкын шке вийлан ӱшанен, шочмо вер-шӧрыштым тӱзатыме, муро-куштымаш дене чоным кандарен илыме нерген Лоскутово кундем гыч Римма Патрушева каласкалыш.
Мер Каҥаш вуйверын еҥже, оналмаш Валерий Мочаев ХI Марий калык погынлан ямдылалтме, ончылно шогышо тӱҥ задаче-влак (йылме, йӱла, тӱвыра да историй) нерген ойлыш. Шернур кундем гыч черетан Марий калык погыныш 13 еҥым сайлыме. Эше коктын кызытсе Мер Каҥашын еҥже-влак каят. Мер актив Погынышто Мер Каҥашыш Шернурысо Ким Васин лӱмеш рӱдӧ библиотечный системым вуйлатыше Ирина Кошкинам темлаш пунчалын.
Шернур кундемысе марий калыкын конференцийже теве могай пунчалым луктын:
— районысо Мер Каҥашын еҥжылан ушем-влакын пашаштым нӧлталаш кучем орган-влак дене кылым пеҥгыдемден, пырля пашам ыштен шогаш темлаш;
— марий йылме кугыжаныш йылме семын Россий Федераций да Марий Элысе Конституцийла негызеш чыла кӱкшытыштат кучылталтшаш;
— школлаште, йочасадлаште кугыжаныш йылме ден шочмо йылмым туныктымашлан кӱлеш верым ойыраш;
— шочмо йылмым туныктымо паша кузе каен шогымым эреак эскерен шогаш,
— ача-ава-влак коклаште марий йылмым туныкташ кӱлмӧ нерген умылтарыме пашам эртараш;
— ялысе культурым вияҥдышашлан тӱткылыкым утларак ойыраш;
— ял ден селалам тӱзатышаш верч тыршаш;
— районысо тӱвыра пашаеҥ-влаклан марий калыкын национальный культуржым, йӱлам, литературым, сымыктышым арален кодымаште, илышыш шыҥдарымаште чулымлыкым утларак ончыкташ;
— марий мер ушем-влаклан кучем орган ден верысе кучем дене пашам чак ышташ;
— самырык тукымым мер пашашке ушымо сомылым вияҥден колташ;
— ола ден ял шотан илем-влак дене пырля эн сай илемлан, яллан районысо смотр-конкурсым эртараш; тудо марий калыкын национальный ойыртемжым, тӱвыражым, йӱлажым аралымашке виктаралтшаш;
— шке сомылым тӱҥалаш шонышо предприниматель-влаклан полшаш;
— марий йылмым, йӱлам арален кодымаште, кушкын толшо тукымым кӱкшӧ мораль да нравственность шӱлышеш шуарен куштымаште калыкнан шӱм-чон поянлыкшын негызше семын ешын рольжым кугемдаш;
— ял, ола шотан илемлаште кумалме верлам, ото-влакым арун кучышашлан тӱткылыкым утларак ойыраш;
— марий юмыйӱлам калык коклаште шарыме пашам вияҥдаш;
— Марий Элым, районым вияҥдымаште кугу надырым пыштыше, пагалымашым сулышо, тӱвырам, йӱлам, йылмым арален кодышаш да вияҥден шогышаш пашаште лым лийде тыршыше-влакым посна жаплаш да палемдаш.
Вставка:
Шернур районысо марий калыкын конференцийже палемда:
Ме умбакыжат моло калык дене пырля ваш келшен, йылмынам, тӱвыранам, йӱланам арален, вияҥден шогышаш верч тыршаш тӱҥалына.
Светлана ПЕХМЕТОВА
Авторын фотожо
