СПОРТ

Яндар юж, чевер кече – тазалык пече

Тений игечын койышыжлан ӧраш гына кодеш. Теле мучко, манаш лиеш, йӱр йӱреш, пуйто шошо. Шуэнрак лум куандара, жапын-жапын чевер кече шыргыжалмыж дене кумылым нӧлталеш.

Изиш юалгырак, но мотор теле кечын Волжский районыш командировко дене миенна. Приволжский кыдалаш школыш пурымо годым стадионышто ече дене коштшо ӱдыр-рвезе-шамычым ужна. Нунын воктеке миен кутыралтыде шымак чыте. Физкультурым туныктышо урокым уремыште эртарен. Тидлан ты кечын игечыжат келшыше лийын: кӱшыч чевер кече ончен, йӱштат чурийым чывыштылан.

– Тунемше-влаклан ече дене мунчалташ моткоч келша. Кызыт   техникым тунемына. Мутлан, эрыкан йєн, классике… Тушко модмо татымат пуртен колтена. Программе почеш пашам ыштена. Сандене уроклаште спортын чыла видшымат авалташ тыршена. Волейбол, футбол, баскетбол, куштылго атлетике, лӱйылтмаш… Кызыт ече тургым, сандене уремыш лекташ тыршена. Яндар юж, чевер кече – тазалык пече,  – мане Приволжский кыдалаш школышто физкульур урокым туныктышо Л.Данилова. – Ече дене чын мунчалташ тунемат гын, результатшат сай лиеш. Ик жап ече шотышто начаррак ыле. Кызыт ача-ава-влак моткоч полшат. Тау нунылан. Такшым вет чылажат еш гыч тӱҥалеш. Пример уло гын, икшыват тырша. Мутат уке, ме тӱрлӧ улына, сандене тунемше кокла гыч южышт йӧршеш ечым огыт йӧрате.

Ӱдыр-рвезе-шамыч спорт дене эртаралтше олимпиадылаште вийыштым тергат. Мутлан, Юлия Воробьёва сайын выступатлен, республикын чемпионкыжо лийын. Тыгак президент модмаште ойыртемалтыт, ГТО нормативым шуктат. ГТО значокым налше-влаклан вузыш тунемаш пурымышт годым могай-гынат шӱкалтыш лиеш.

Любовь Васильевна шкежат жапше годым тале ечызе лийын. Спорт мастерыш кандидат нормативым шуктен, а кызыт йоча-влаклан – сай пример.

– Тидлан Памар кыдалаш школышто тунеммем годым тренер Евгений Кириллович Фёдоров кугу шӱкалтышым ыштен. Тудо моткоч опытан, тале туныктышо ыле. Ме, йоча-влак, урок деч вара шуко жапым уремыште, яндар южышто лийынна, жапым тренировкылан ойыренна. Тидлан шке деч изирак-шамычым кумылаҥденна. Нунат почешна тыршеныт, – ойла Любовь Васильевна. – Таче кечын моштымем йоча-влаклан пуаш тыршем, вет нуно  ончыкыжым шкан профессийым, у илышкорным ойырымо шотышто тӱҥалтыш негызым садак школышто пыштат. Тек ӱдыр-рвезе-шамыч уш-акыл, тыгак капкыл денат таза лийыт. 

Е.ЭШКИНИНА

Опубликовать в Одноклассники

Добавить комментарий