Теҥгече республикыш паша визит дене толшо Россий Федераций президентын Юл кундем федерал округышто полномочный представительже Игорь Комаров правительство пӧртышто Марий Элыште у тӱҥ федеральный инспектор Павел Волков дене палымым ыштыш.
Марий Элыште тӱҥ федеральный инспекторын пашажым шуктышо П.Журавльевын февраль тӱҥалтыште вес вере куснымыжлан кӧра ты сомылым жаплан Павел Волков шуктен. Тудо полпред аппаратыште латкум ий пашам ышта, Ульяновск областьыште тӱҥ федеральный испекторлан ыштыме опытшат уло.
Теҥгече И.А.Комаров тудын дене А.А.Евстифеевым, министерстве, ведомство, вуйлатыше-влакым, журналист-шамычым официально палымым ыштыш. Тылеч вара республик вуйлатыше А.Евстифеев регионын экономикыже вияҥме, национальный проект-влакым тичмашын илышыш шыҥдарымыже, кугу лӱмгече-влаклан ямдылалтмыж нерген каласкалыш да мемнан ончылан шындыме задаче-шамычым у федеральный инспектор дене пырля умылен да ваш полшен решатлаш тӱҥалына манын палемден кодыш.
Тылеч вара мутым Павел Вальеревич нале да ты должностьыш ӱшанен шогалтымылан кугу тауым ыштыш. Мылам шке национальный йӱлажым арален моштышо республикыште пашам ышташ – кугу чап, ончыкыжым республикылан пайдам кондаш тыршаш тӱҥалам манын, ӱшандарен ойлыш. Вашлиймаш деч вара у тӱҥ федеральный инспектор журналист-шамычын йодышыштлан вашештыш.
Р.ЧЕПАКОВА
