Эртыше кечылаште Йошкар-Оласе спорт объектлаште, ечыгорнылаште тӱрлӧ кӱкшытан ятыр таҥасымаш эртыш. Нунын коклаште иктыже – ветеран-афганец-влакым шарныме лӱмеш бокс дене йӱлаш пурышо турнир. Тудо тений коло визымше гана эртаралте.
Ты гана таҥасымаш Йошкар-Оласе торгово-технологический колледжын спортзалыштыже лие. Тушко ятыр боксёр чумырген. Ойыртемалтшаш, ончыко лекшаш верч участник-влак кум кече вийыштым тергеныт.
– Ты турнирыште элнан шым регионжо гыч 192 спортсмен таҥасен. Мемнан школ гыч 28 боксёр вийжым терген, – ойла Волжский районысо Купсола села гыч, кызыт Приволжский школ пеленысе бокс дене спорт школын вуйлатышыже А.Степанов. – Финалыш 22 еҥ лектын. Шукышт сеҥыше радамыште улыт. Шке тӱшкаштышт Александр Иванов, Максим Дуков, Алиса Дохно, Кирилл Афанасьев, Никита Пушков, Данил Степанов икымше верым налыныт. ӱдыр-рвезе-влак тренировкыш кумылын коштыт, тыршат. Южыштлан ача-аваштат полшат. Татарстан, Чуваш республикла, Киров, Кострома, Нижегородский областьла гыч толшо-влакат тале лийыныт.
– Ты гана чыла сай, но пеш неле ыле. Тиде соперник дене кокымшо гана рингыш логалынам. Шкеже Киров гыч, виян рвезе. Ты бой мыйын 64-ше ыле. Тышеч кудытыштыжо сеҥалтыным, – ринг деч вара шӱлешт-шӱлешт мане Александр Васильевичын воспитанникше Никита Пушков. – ӱмаште апрельыште Юл кундем федерал округышто вием тергенам. Тунам сеҥалтынам гынат, мыланем шарнымашеш кодын. Тыгай кӱкшытан турнирыште икымше лият гын, Российын первенствышкыже логалаш йєн лектеш.
Рвезе Приволжский посёлкысо кыдалаш школышто, шымше классыште тунемеш. Бокс дене таҥасымашке чӱчкыдынак Никитан ачаже мияш тырша. Тудыжо моло верчынат шке эргыж семынак тургыжлана.
Теве рингыште адакат ты школын воспитанникше. Данил Степанов ден Киров область гыч Никита Щеклеин таҥасат. Залыште жаплан я моткоч шып лийын кая, я ончаш толшо-влак чылан кычкыраш тўҥалыт. Коктынат чын удар дене технически ойыртемалтыт. Такшым мыланем тыгай торжалык, спортын тыгай видше йӧршеш ок келше. Палемдыме жап мучашке лишеме. Теве тыге кок самырык боксёр пўтынь залым тургыжландарен кертыч. Чынжымак нуно моткоч сай бойым ончыктышт.
– Мыйын тиде 63-шо бой ыле. Тушеч нылытыштыже сеҥалтынам. Мутат уке, кажныже шкешотан да неле. Ты вид дене шымше ий кыртмен ямдылалтам. Бокс шкем аралаш, ӱшанле, пеҥгыде койыш-шоктышан лияш туныкта. Тау тренерем Александр Васильевич Степановлан, – мане шке тӱшкаштыже икымше верым налше, Приволжский школыштак 8-ше классыште тунемше Д.Степанов.
Турнир сай кӱкшытыштє эртен. Сеҥыше-влаклан кубокым, Чап грамотым, шарнымашан пєлекым кучыктеныт. Тренер-влакат шке воспитанникышт верч тургыжланеныт, ой-каҥашышт дене полшеныт, рингыште кузе шкем кучаш туныктеныт. Теве тыге тунемше-влак опытым погат, капкылым шуарат.
Лач ик сӱрет кумылым волтыш: спортзалысе пырдыж верын-верын шемемын, туврашыжат вӱдыжген, вес тӱсым налын. Шижалтеш, олмыкташ шагал огыл шийвундым луктын пыштыман.
Е.ЭШКИНИНА
Снимкылаште: Н.Пушков, Д.Степанов, тренер А.Степанов воспитанникше-влак дене.
Авторын фотожо
