КУЛЬТУР ДА ИСКУССТВО
КУЛЬТУР ДА ИСКУССТВО

Нуно пашам ыштен канат

Артист-влак вашештат

Нуно пашам ыштен канат

Вашке кеҥеж шуэш. Шукышт ты пагытыште отпускыш лектыт да тӱрлӧ верыш канаш каят. Марий мурызо, артист-влак ты кеҥежым кушто эртараш шонат?

Светлана Филиппова, М.Шкетан лӱмеш Марий кугыжаныш драме театрын артистше:

— Тений йочам-влак дене пырля санаторийыш канаш да тазалыкым пенгыдемдаш каяш путевкым пуэныт. Июньышто тушто лиймеке, варажым шочмо ялышкат миен толаш шонена.

Галина Якушева, мурызо:

— Кеҥежын икымше тылзыштыже мый отпускышто лиям. Июнь пайремлан поян: 10 числаште сӱан кечым палемдена. А 12 июньышто пелашемын шочмо кечыжлан шочшына, уныкана-влак дене пырля Звенигово ола воктене Юл эҥерысе отрош кечыгутлан каена. Палаткым шогалтена, пуш дене коштына, колым кучен, шӱрым шолтена да молат. А кеҥежлан мӧҥгӧ гыч торашке лекмаш уке. Вет ялыште йокрокланаш жап уке: шудым солена, емыж-саскам погаш коштына. Адакшым тений презым налынна, каза-шамыч улыт, сандене нуным коден каяш ок лий.

Игорь Актуганов, Марий Элын калык артистше:

— Июньышто театр коллектив дене гастрольышто лийына гын, июльышто канаш тӱҥалына. Ӧрдыж кундемыш каяш шонымаш уке. Кеҥежым ялыште моткоч сӧрал. Адакшым ӱдырна йочасадыш кая, тидланат ямдылалташ кӱлеш.

Анатолий Зарецких, Марий Элын сулло артистше:

— Талук мучкат канымаш уке манаш лиеш. Но тидлан мый ом ӧкынӧ, вет артист пашажымат каныме семынак ышта. Кеҥежым концерт дене лекташ келшыше жап, сандене тӱрлӧ кундемыш миен толаш шонена. Кажне концерт — весела пайрем!

Опубликовать в Одноклассники

Добавить комментарий