Нижегородский районный суд Марий Элын ончычсо вуйлатышыже Леонид Маркеловын погыжым поген налме нерген решенийым савыктен.
Тидын тӱрыс кугытшо 2 миллиард теҥгем эрталта. Генеральный прокурорын алмаштышыжын йодмыж дене келшышын, чыла погыжо Россий Федерацийын парышышкыже кусна.
Палемдыме почеш, Маркеловын вер гыч верыш кусараш лийме да лийдыме погыжым, сӧрастарышыжым, моло шергакан ӱзгарже ден арвержым поген налыныт. Тиде радамыште 15 миллион теҥгеаш пачер, 190 тӱжем гыч 111 миллион теҥге марте акаш зданий ден пӧлем-влак, 16 транспорт средства, мланде участке, акций, шарнымаш монете, шӧртньӧ слитке, сабле, кинжал, моло улыт. Палемдаш лиеш «Breguet» кидшагатым. Тудын акше 805 тӱжем теҥге. Ты радамышкак кӱртньӧ гыч да пыстылан, титан дене «леведме» 450 тӱжем теҥгеаш ручка, аллигаторын коваштыже ӱмбалан сото телефон, Иисус Христосым ырес гыч волтымо библийысе сценым ончыктымо 300 тӱжем наре теҥгеаш сӱрет пурталтыныт.
Ушештарена, Нижегородский районный суд Леонид Маркеловым, республикын ончычсо ялозанлык министрже Ираида Долгушевам да «Телекомпания 12 регион» организацийын директоржо Наталья Кожановам 2 апрель марте петырымаште кучаш пунчалым луктын.
Л.КАМАЛЕТДИНОВА
