ЯЛ ИЛЫШ

«Марла газетым ӱмырешлан йӧратен шынденам», —

манеш Советский район Кукмарий ялыште илыше, «Марий Эл» газетын эртарыме лотерей дене вич мешак пырчым модын налше З.Иванова.

Зинаида Петровна ӱмыржӧ мучко, рашыракше кумло вич ий, Кукмарий школышто пашам ыштен, тӱҥалтыш класслаште икшыве-влакым туныктен, илыш корныш лукташ ямдылен. Пелашыже, Николай Савельевич, верысе колхозышто тыршен, машинам виктарен.

— Ынде мыланем шымлу ий темын, пелашемлан – шымле нылыт, — каласкала пашан ветеранже, ончычсо туныктышо З.Иванова. – Мыняр илена, шочмо йылме дене лекше рӱдӧ марий газетым эре гаяк лудынна. Ик жап веле изишак кӱрылтыш лийын. Подписной кампаний тӱҥалешат, «Марий Эл» ден «Сурт-пече» газетлан кажне гана возалтына. Газетыште утларакше ойлымашым, илыш гыч сӱрет-шамычым, пенсионер-влаклан пєлеклалтше, моло оҥай материалым лудаш йєратем. Теве кызыт Вениамин Ивановын  «Тӱтан» романжым печатледа. Кеч книгажым шукертак тӱрыс лудынам, адакат уэш лудаш кумыл уло. Ял илыш, фермер-влак нергенат пален налаш оҥай. Кроссвордысо, сканвордысо йодыш-влаклан вашмутым кычалаш йєратем. Мом ом пале, ом му гын, вара вес номерыште рашемдем. Такшым пӱтынь газетым ончен лектам. Газет толешат, тудым пелашем дене коктын тавален лудына. Коктын ик газетым пелыгыч ыштен шергалына. Мыйже «Тиде   лаштыкым пу мыланем» манам. Теве тыге газетлан шӱмаҥынна. Лотерей дене ынде кокымшо гана модын налам. Ончычшо отвертко-влак набор логалын ыле, марием тудын дене пайдалана, тӱрлым пӱтыркала. Мӧҥгӧ озанлыкыште вет чылажат кӱлешан. Лотерей модылтмо нерген газетыште савыктыме жапыште Советский рӱдӧ эмлымверыште лийынам да  мыланем пошкудо-влак йыҥгыртат: «Зинаида, тый вич мешак пырчым модын налынат!» Чынак, куаненам ыле. Тау лотерейым эртарымыланда.

Зинаида Петровна школышто пашам ыштен гын, шочмо школжын пӱрымашыже тудымат тургыжландара. Кызыт Кукмарий школышко улыжат кумло икшыве коштеш. Тыгодымак тиде кундем гыч коло икшывым Ӱшнур кыдалаш школыш автобус дене шупшыктат.

Ивановмыт ныл икшывым ончен куштеныт. Коктынжо Москваште улыт, коктын Йошкар-Олаште илат. Зинаида Петровнан мутшо почеш, паша вер лиеш гын, Кукмарий кундемат тӱзлана, калык єрдыжкє илаш ок кай ыле. Йӧра кеч «КАМ» тӱшка озанлык уло. Тудо кеч изишак гынат, паша верым пуэн. А.Куклинын вуйлатыме озанлыкше шукияш шудым кушта, прессоватлен ужала. Тыгак пырчым ӱда, тудымат ужала, но вольыкшо уке. Тыге телым механизатор-влакат паша деч посна шинчат.

— Пырчым лотерейлан ойырышо Советский район Ленин лӱмеш колхозланат тау, — ойлыш З.Иванова. – Вольыкым ынде огына кучо, а теве чывына-влак улыт. Пырче чывылан пукшаш лачеш толеш.

В.СМОЛЕНЦЕВ

Снимкыште: З.Иванова

Опубликовать в Одноклассники

Добавить комментарий