Марий Элыште у чодырам шындаш нӧшмым ямдылыме тургым пагыт кая.
2019 ийыште чодыра пашаеҥ-влак 1,5 тонн ты шапашым ямдыленыт. А кызыт погымо пӱгыльмыжым кошташ да тушеч нӧшмым лукташ кӱлеш. Тачысе кечылан республикыште тыгай пашам Каппер типан сушилке полшымо дене шуктат. Иктыже «Лесхоз» ООО-н Шернур посёлкышто, весыже «Звенигово лес» ООО-н Звенигово олаште верланеныт. Кеч кодшо ийын кокымшыжо пашам ыштен огыл. Тений тушто 4,338 тонн пӱгыльмым погеныт. Тудым март марте коштен да нӧшмым лукмо пашам тӱрыс мучашлышаш улыт. Кызытеш 1 тонн утларак пӱгыльмыжым переработатленыт.
А теве Шернурышто сушилкыже шкенжын преработатлыме сырьёж негызешак ышта манаш лиеш. Пӱгыльмым кошташ кучылтмо коҥгажым лекше пӱгыльмыж денак олтат. Пӱртӱсат тений куандарен, кож пӱгыльмӧ сайын шочын. Санденак тений тушто тудым молгунамсе деч утларак шапашлен кертыныт.
Палемден кодыман, ты лесхозышто урлыкым саемдыме нӧшмӧ гыч ончен куштымо пӱнчӧ да кож плантаций-влак улыт. Тений тушто гына 230 килограмм пӱгльымым погеныт. Тушечат тыгаяк саемдыме урлыкаш нӧшмо лектеш.
Чодыра специалист-влакын ойлымышт почеш, пушеҥгым шындаш ямдылыме нӧшмӧ шапаш ончыклык вич ийлан ситыше уло.
С.НОСОВА
