ТОШКАЛТЫШ

Чыла вере интернет

Ожно интернет деч посна ласкан иленыт гын, кызыт туддеч посна ик кечат ок эрте. Мыняр жапым вара лудшына-влак тудлан пӧлеклаш ямде улыт?

Геннадий Полатов, Морко район:

Пашалан да уверым кычалаш шукыж годым кучылтам. Соцсетьылаште шинчем. Чылажлан иктаж 3-4 шагат кая.  

Александр Гаврилов (Чубайс), Волжский район:

Олаште вольыкым ончаш огеш кӱл, шортын кийыше йоча уке, садлан паша деч вара яра жап шуко. Тунам телефон – чӱчкыдынак кидыште. Тушто увер-влакым ончем,  конкурслаште вием тергем, йолташ-влак дене кутырем.

Виктория Егорова, Йошкар-Ола:

Мый Инстаграм, WhatsApp приложенийла гоч пашам ыштем, садлан ик вич шагатым кечыште ойырем. Тыгак, тудын дене пайдаланен, книгам лудам, мурым колыштам.

Екатерина Милютина, Звенигово район:

Кече мучко интернетыште чӱчкыдын шинчаш логалеш. Кызыт пашам туддеч посна ышташ огеш лий. Тыгак эртыше кеҥежым коммерческий огыл «Интеллектуал» организацийын эртарыме «Этноблогер школ» проектышкыже ушненам ыле. Тидыже интернетыште эше шукырак шинчаш тарата.

О.МОШКИНА

Опубликовать в Одноклассники

Добавить комментарий