МЕР ИЛЫШ ДА ЙӰЛА

У еҥлан ӱшаным ыштеныт

Кодшо кугарнян Марий калыкле конгрессын отчёт да сайлымаш погынымашыже эртыш.

Тудым мер организацийын председательже Евгений Кузьмин вӱдыш. Тудак кодшо ийысе пашам иктешлыш. Пытартыш жапыште конгрессын пашаже культур да научно-просветительский велыш лупшалтын манашат лиеш. Каласен кодыман, кызытсе вуйлатышыже кодшо ийын республикысе Кугыжаныш Погынын депутатшылан сайлалтын, сандене идалык тудын «шокшо» лийын. Туге гынат мер пашалан жапым муашак тыршен. Организацийын исполком вуйлатышыже, «Кугарня» газетын тӱҥ редакторжо Эдуард Иманаеват тудлан полшен. Тиде амал денак Евгений Петрович шкенжым ты паша гыч утараш йодын да у вуйлатышылан ӱшанле полышкалышыжым темлыш. Президиумын еҥже-влак ик йӱк дене тудым сайлышт.

 Погынымаште ты гана исполком вуйлатышым ышт палемде, но тушко куд еҥым ойырышт. Варажым нуно шке коклаштышт ончылъеҥыштым ойырышаш улыт манын пунчальыч.

Ты гана ревизионный комиссий вуйлатышат паша деч кораҥаш кумылым ончыктыш. Г.Куклин олмеш У Торьял район гыч чолга еҥ Николай Сидоркиным сайлышт.

 Отчет да сайлымаш деч вара погынышо-влак тенийлан у паша планым пенгыдемдышт. Тудын дене Эдуард Иманаев палдарыш. Мутат уке, эн кугу пашаже Марий калыкын черетан Погынжылан ямдылалтме дене кылдалтын.  Кеч ты пашаште веле огыл Марий конгресс Мер Каҥаш дене ваш полшен пашам ыштат. Тидым погынымашке толшо оньыжа Эдуард Александроват палемдыш.

Каласен кодыман, организацийын у планыштыже ончыктымо ятыр сай ошкылжылан негыз кызытак ышталтын. Мутлан, Йошкар-Олаште лӱмлӧ кӱслезе А.Р.Сидушкиналан мемориал оҥа ямде, почаш гына кодын. Кужэҥер районышто лӱмлӧ писатель да журналист В.А.Петуховлан шарнымаш оҥам лишыл жапыште почмо дене пырля ты районын чолга еҥже-влак дене кылым пеҥгыдемдаш лийме. Конгрессын тыгай еҥже-влак кажне гаяк районышто улыт. Мутлан, Параньга, У Торъял велне нуно сайын пашам ыштат, тӱрлӧ мероприятийым эртарат.  Волжский район дене кылым пеҥгыдемдаш манынак конгрессын еҥже-влак туштат вашлиймашым ышташ палемденыт. А теве Звенигово районысо Какшамарий кундемыште ынде шукертсек Я.А.Эшпайлан тоштер пӧртым почнешт. Тушто илыше-влак конгресс вуйлатыше-влак деке полышым йодын лектыныт. Сандене ты пашам ворандарен колташ манын, тӱрлӧ кӱкшытан депутат-влакым ушен, верыш лекташ палемдыме. Лӱмлӧ шанчызе О.А.Сергеевлан «Кӱчык черемис мутерым» савыкташ полшаш шонымашыштат уло…  Икманаш,  ончыкылан план изижак огыл. Мутат уке, организацийын пашажым вияҥдаш полшен кертше проект-влакымат возаш мондыман огыл.  Тиде йӧн денак мер пашаште чолганрак пайдаланаш темлыш республикысе тӱвыра, савыктыш да калык паша шотышто министрын алмаштышыже Галина Ширяева. 

С.НОСОВА

Снимкыште: Марий национальный

конгрессым ынде

Эдуард Иманаев вуйлата

 Авторын фотожо

Опубликовать в Одноклассники

Добавить комментарий