СОЦИАЛ ИЛЫШ УВЕР ЙОГЫН

Кундеметым тӱзате, поянлыкшым арале

Кундеметым тӱзате, поянлыкшым арале

Шарнена гын веле… илат

Советский районысо «Ӱшнур ял кундем» муниципальный образованийын администрацийже шеҥгелне тора гыч ончалмаште пеш мотор Мемориал комплекс шога.  Лишкыже миет да ӧрын-лӱдын колтет: мел велже эше сайла коеш, но шеҥгелныже кӱ катлен йоген, негызат шуалген. Тиде тӧрсырым кораҥдаш огыл гын, Мемориал комплекс икмыняр жап гыч сӱмырленат кертеш.

Кугу Отечественный сарыште вуйым пыштыше-влакым шарныме лӱмеш мемориал комплексым (снимкыште) верысе туныктышо-влак Михаил Филиппович ден Валентина Васильевна Домрачевмытын тӱҥалтышышт почеш «У илыш» колхоз 30 ий утла ончычак чоҥен. Кызыт тудын йыр куэжат, лыстанвӱнчыжат, сиреньжат палынак нӧлталтыныт, шыве-шыве тарванылмышт дене шкешотан семым луктыт…Тышке логалмек, сарыште тыныс верч вуйым пыштыше-влакын кужу спискыштым лудын лекде, нунылан вуйым савыде отак чыте.

Мемориал комплексым кажне ийын Сеҥымаш кече вашеш администраций пашаеҥ-влак эрыктат, тӱзатат да лийме семын олмыктат. Теният тыште велше лышташым, утыжденат шуйналтше, кошкышо кушкыл укшлам кораҥденыт, бордюрым ошемденыт, но памятникым олмыкташ оксам муын огытыл.

Таче кечылан Ӱшнур кундемыште Кугу Отечественный сарын ветеранже кодын огыл, тылын 27 труженикше ила. Сеҥымаш кечылан пӧлеклалтше митингыш ынде нунымак гына ӱжыт. Сарын неле-йӧсыжым чытен лекше, шаланыше элнам нӧлтымаште тыршыше пагалыме еҥна-влаклан каткалалт йогышо Мемориал комплексым ужаш каньылыжак огыл, очыни…

Почешмут семын: республикыштына тыгай сӱретым кажне гаяк кундемыште ужаш лиеш. Тӧрсыр чыла вере окса чӱдылык дене умылтаралтеш. А мыйым ик йодыш тургыжландара: ончыкылык тукымлан могай примерым ончыктена? Ме шарнымым да пагалымым чарнена гын, кугу сарын тулыштыжо вуйым пыштыше-влакынат лӱмышт йомеш огыл мо?

М.ИВАНОВА.

Снимкыште: Ӱшнур селасе Мемориал комплекс.

Авторын фотожо.

Опубликовать в Одноклассники

Добавить комментарий