8 февральыште 8 гыч 13 шагат йотке Республиканский онкологический диспансерыште Рак дене кучедалме тӱнямбал кечылан пӧлеклалтше Почмо омса кече эрта.
Тиде кечын медицине организацийыш толшо кажне еҥ врач-онкологын приёмыштыжо лийын кертеш.
Эртыше ийын тиде йӧн дене республикыште илыше 405 еҥ пайдаланен. Нуно онкологын, гинекологын, маммологын, проктологын, дерматологын консультацийыштышт лийыныт. Тунам 70 маммографийым ыштыме да 34 УЗИ-шымлымашым эртарыме. Врач-шамыч осал пуалше дене черланыме ик случайым пеҥгыдемденыт да 11 пациентым рак дене черланен кертме шотышто келгынрак тергалташ колтеныт.
Тазалыкым тергаш лийме йӧн дене тиде ийынат пайдаланыде ида код. Пелен паспортым, СНИЛС-ым да страховой полисым налза.
Чыла йодышым онкодиспансерысе регистратурын 42-26-20 номеран телефонжо дене рашемдаш лиеш.
М.ИВАНОВА
