20 январь гыч Роспотребнадзор никотинан шупшаш лийдыме продукций шотышто черетдыме всероссийский «шокшо линийым» эртара. Тудо Роспотребнадзорын Марий Элысе виктемыштыжат 3 февраль йотке пашам ышта. Акцийым эртарыме амал палемдыме продукцийын поснак йоча-шамычлан чот лӱдыкшӧ улмыжо да нуным тиде шапшак дене пайдаланыме деч лийме семын шӧрымӧ дене кылдалтын.
Виктемын специалистше-влак 20 январь гыч 3 февраль марте калыклан ужалаш чарыме никотинан шупшаш лийдыме продукцийын аяр дене иктӧр улмыжо да тазалыклан кугу зияным ыштен кертмыж нерген радамын каласкалат.
Роспотребнадзорын шымлымыж почеш, снюсышто тамак продукцийлан палемдыме норматив дене таҥастарымаште концентрацийысе никотин 20-30 пачаш шуко, да ик снюс дене пайдаланыме иканаште 20-30 сигаретым шупшмо дене иктӧр лиеш.
Республикыште илыше-влак тургыжландарыше йодышыштым 8-800-707-61-77, 68-19-44 номеран телефон дене «шокшо линийыш» йыҥгыртен рашемден кертыт.
Тылеч посна палемдыме йодыш дене консультацийым сутка мучко да каныш, пайрем кечыла деч посна Роспотребнадзорын Консультацийым пуымо единый рӱдерыштыже 8-800-555-49-43 телефон дене налаш йӧн уло. Тиде номерыш Российыште чылт яра йыҥгырташ лиеш.
Снюс дене кылдалтше пӱсӧ йодыш Роспотребнадзорын пеҥгыде контрольыштыжо кодеш.
М.ИВАНОВА
