УВЕР ЙОГЫН

«Озанлыкыште нимо уто огеш лий»

Эртыше арнян редакцийышкына 2020 ийын икымше пелыжлан «Марий Эл» ден «Сурт-пече» газет-влаклан возалтме квитанций негызеш эртарыме лотерейнан тӱҥ призшым – мультиваркым – модын налше А.Гребнева уныкаж дене пырля тольо.

Анастасия Николаевна 1942 ийыште Параньга районысо Кугу Памашъялыште шочын, тений 8 январьыште 78 ийым темен. Тӱҥалтыш школым тунем пытарымыж деч вара тӱшка озанлыкыш рядовой колхозниклан каен, вара дояркылан, вольык ончышылан, кӱтӱчылан ыштен, икмыняр жап чоҥымо пашаштат тыршен. Шернур районысо Памашсола ял качылан марлан лектын, но еш илыш шотлан толын огылат, ӱдыржым пеленже налын, шочмо суртышкыжо пӧртылын. Кызыт эше кок уныкаже, уныкаже-влакын кок шочшышт улыт.

– Шкемым мо шарнем, эре «Марий Эл» газетым лудам. Мыланем тушто чыла келша. Газетым почто яшлык гыч пуртем, шинчалыкем чием да икымше гыч пытартыш лаштык марте чылажымат радамын окем, нимом ом ойыркале але вес кечылан ом кодо,  – манеш Анастасия Николаевна. – «Сурт-пече» газетымат ош тӱняш лекташ тӱҥалмыж годсек налам. Туштыжо икымше лаштыкыш вераҥдыме сурт-печым ончаш йӧратем, тиде гана могай кундем гыч, кӧным шынденыт манын ончем.

– Ковам вачӱмбакыже 78 ийым пыштен гынат, Юмылан тау, эше пеш чулым, чолга, чатка да путырак оҥай, – мутланымашке А.Гребневан уныкаже ушныш. – Пӧртна ял вуйышто верланен, сандене кундемышкына толшылан тудо кид копаште улмыла коеш. Ковам сурт-печым веле огыл, сад-пакчамат моткоч чаткан куча. Кеҥежым эре йыраҥыште шогылтеш: сомыла, пушкыдемда… Ола але посёлко гыч мойн толшо-влак, пареҥге да ушмен пакчанам ужын, чылан гаяк ӧрын маныт: «Пакчаштыдаже эсогыл ик шӱкшудо огеш куш!» Чылажат – ковамын тыршымыжлан кӧра! Тудо авамын пашаште улмыж годым ушкалымат, презымат, шорыкымат кумылын онча… Ик минутымат яра огеш шинче. Кеҥежым вольыкым кӱташ лектеш гынат, пеленже эре газетым налеш.

Анастасия Николаевнан кожмак, чатка койышан да поро чонан улмыжым меат, газет пашаеҥ-влак, пеҥгыдемден кертына. Кузе? Редакцийыш йокма шотеш кондымо тыгыде ковышта когыльыжым ончалза (снимкыште): кузе йытыран тӱрлымӧ, ик семын кӱктымӧ! Чыла тидын дене мыняре шогылташ кӱлеш!

– Шӧр-торык, пакчасаска ситышын уло, сандене когыльым таче эрдене коҥгаште лӱмынак тыланда кӱэштым, – изи йочала шыргыжале илалше ӱдырамаш. Тамлен, кӧргыжым ончалын-аклен кочмынам ужын ешарыш. – Ковышта когыльылан чӱчкыдынжӧ полтавский тар шӱрашым налам – тыге кӧргӧ тамлырак, шымарак лиеш, а кочкыш – перканрак. Суртышкына канде тулым шукертак пуртеныт гынат, коҥгам коденам. Тушан кӱктымӧ шӱр ден жаркойлан нимо ок шу! Шоганан ма шӱрашан мелнамат эре тушанак кӱэштам.  

А мультиварке? Суртышто газат, коҥгат улыт гын, мультиваркыже кӱлеш мо?

– Мыланемже ынде огешат кӱл, очыни… А самырык-шамыч, ӱдырем, уныкам-влак, тек пайдаланат! Озанлыкыште нимо уто огеш лий, – мультиварке коробкам ӧндал кучыш Анастасия Николаевна. – Паледа. «Марий Эл» газетлан ӱмырем мучко гаяк возалтынам, лотерей дене иктаж-мом модын налаш шонен, квитанцийымат эре колтенам, а призым икымше гана налынам. Пеш куаненам. Тау, тыланда! Таза лийза, калыклан ыштыме пашада куаным кондыжо!

М.ИВАНОВА

Авторын фотожо

Опубликовать в Одноклассники

Добавить комментарий