Пошкырт кундем Мишкан села тенийлан финн-угор тӱнян тӱвыра рӱдыверышкыже савырныме нерген возенна ыле. Тушто идалык мучко эртарыме кугурак мероприятий-влак радамымат пеҥгыдемденыт. Тудын дене лудшына-влакымат палдарена.
Латкум тыгай мероприятийыш уна-влакым вучат. Нунын коклаште «Ӱярня» пайрем, «Марий патыр» конкурс (29 февраль), финн-угор тунян эн мотор ӱдыржым ойырымо «Саскавий» конкурс (20 март), «Шошо пайрем» (16 апрель), «Кидкопаште кече» йоча усталык конкурс (1 май), Семык пайрем (3 июнь), Пеледыш пайрем, районын 90 ияш лӱмгечыжлан пӧлеклалтше «Эр ӱжаран лекме кундем» пайрем, «Finno Ugric open air» самырык-влакын фестивальышт (20 июнь), «Кушташ йодеш чонемже» марий куштымаш конкурс (21 июнь), «Маска пайрем» (12 сентябрь), «Яндар йӱк» марий эстраде мурызо-влакын конкурсышт (14-15 ноябрь) лийыт.
Кок шанче-практике конференций палемдалтын: иктыже — «Марий йылме, йӱла, тӱвыра — калыкын тӱҥ поянлыкше» (27 март), весыже «Кумалтыш» йӱла дене кылдалтшыже кумалме вер-влакым аралыме йодышлан пӧлеклалтеш. 9-12 июльышто Марий самырык тукым слёт, а 10-11 июльышто финн-угор сӱретче-влакын пленерышт эртышаш.
Идалыкым торжественно 13 декабрьыште петырат. Организатор-влак ончылгоч шижтарат: мероприятийым эртарыме кече-влакым вашталенат кертыт.
С.НОСОВА
