КРАЕВЕДЕНИЙ

Миен толын ужмылан мо шуэш?

Йошкар-Оласе Благовещений башньыште «Марий Элын поликультурный картыже» проект дене идалык ончычак пашам ышташ тӱҥалыныт. 22 январьыште тушто латкокымшо, ындыжым Шернур районын культуржо, историйже дене кылдалтше, выставке видеопрезентаций дене почылтын.

Марий Элын культур, савыктыш да калык паша шотышто министрже К.Иванов Шернур кундем талантан ятыр еҥым шочыктымыжым,  культуржо да йӱлаж дене поян улмыжым поснак палемдыш. Олмыктымо деч вара Лажъял культур пӧртым почмо годым калыкын кумылжо, нунын тауштымышт пашам эшеат кугу куат дене ышташ таратышт манын каласыш.  

А ты выставкым почмо кечын саламлышыжат, ончаш толшыжат ятырак лийыныт. Шернур район администрацийым вуйлатыше А.Кугергинын ойлымыж почеш, кундемын тачысе вий-куатше ончычсо семынак — ялозанлык преприятий-влак (тӱрлӧ форман 30 субъект). Пытартыш жапыште национальный проект-влакым илышыш пуртымашке чолган ушненыт. Тудын дене келшышын 2019 ийыште чыла тӱрлӧ сферымат вияҥдымашке 500 миллион утла теҥге пышталтын: шергакан медицине оборудований, Лажъял культур пӧрт, Казанский селасе школ леведыш, Шернурысо 2-шо №-ан школым капитально олмыктымаш да класслам спецоборудований дене пойдарымаш, пассажир-влаклан вучымо зал… Ты кундем ынде турист-влакланат утларак оҥай лийын – декабрьыште марий Йӱштӧ Кугызан илемжым почмо. Александр Викторович шкежат выставкыш саламлаш толын ыле.

Марий Элын ялозанлык да кочкыш сату министрже А.Гречихо, ты районын кураторжо, эшеат куандарыше уверым каласыш – 2019 ийыште ялозанлыкысе паша лектыш дене чыла шотыштат сай кӱкшытым ончыктеныт. Тылеч посна 2018 ийыште Марий Эл вуйлатышын мланде реестрым ямдылаш да тудым инвестор-влаклан  темлаш кӱштымым жапыштыже шуктеныт. Ойырымо 4,5 тӱжем гектар мланде тенийысе идалык мучаш марте чыла курал-ӱдымӧ лиеш. «Лукоз» агрохолдингын директор-влак советшым вуйлатыше В.Кожанов Шернур кундемысе калыклан умбакыжат тыгак ончыко ончен пашам ышташ тыланыш.

Выставкым почмаште Йошкар-Олаште илыше ятыр земляк лийын. Нунын лӱм дене «Истоки» землячествым вуйлатыше Е.Пайдышев саламлен. А уна-шамычлан поро тыланымашыжым Кукнур гыч толшо марий Йӱштӧ Кугызат ойлен. Тӱня мучко чапланыше киноактер Йыван Кырлан шочмо кундемже тений Йошкар Пеледыш пайремым эртараш тӱҥалмылан 100 ий теммым кумдан ямдылалташ тӱҥалеш. Шернур-влак уло кумылын пайремыш ушнаш ӱжыт.

Выставке тылзе мучко шуйна. Варажым эстафетым вес район налеш. А чыла ола ден район-влакын иктешлыше кугу выставкышт 4 ноябрьыште, Марий Элын 100 ияш лӱмгечыжым пайремлыме годым, почылтеш.

 С.ПЕХМЕТОВА

М.Скобелевын фотожо

Опубликовать в Одноклассники

Добавить комментарий