УВЕР ЙОГЫН ЭКОНОМИКЕ

Ялозанлыкым у кӱкшытыш нӧлталшаш верч

Увертаренна ыле: 10 майыште Марий Эл Республикым вуйлатышын пашажым жаплан шуктышо Александр Евстифеев Указше дене республикын ялозанлык да продовольствий министржылан Юрий Сидыгановым шогалтен. А теҥгече, 15 майыште, тудо у министр дене район администраций вуйлатыше, министерстве ден водомство пашаеҥ-влакым палдарен. Тыгак паша совещанийым эртарен. Тушто республикыштына кызыт ялысе тургым жап, шошо агам писынрак эртарен колтымо йодышым каҥашыме.

Александр Евстифеев министр Ю.Сидыганов дене палдарышыжла, тидым палемден: Юрий Николаевич шуко жап республикыштына тыршен, сандене Марий Элыште илыше-влаклан сайын палыме еҥ. Тудо утларак кугу вийым науко пашалан ойырен. 1990 ийыште технический науко кандидат учёный степеньым налын, а 2004 ийыште Россий Федерацийын Образований министерствыжын Кӱшыл аттестационный комиссийже технический науко доктор учёный степеньым пуэн.

Юрий Сидыганов 1959 ий 18 январьыште Кужэҥер районысо Пӱнчерйымал ялыште шочын. 1984 ийыште М.Горький лӱмеш марий политехнический институтым тунем лектын да тыштак паша ышташ кодын. 1995 ий гыч чодыра да ялозанлык машине кафедрын доцентше, а 2008 ий гыч машине да оборудований дене пайдаланыме кафедрын профессоржо. Волгатехын сайтыштыже 22 ий научно-педагогический пашаште тыршымыже, тушечын 19 ийже кӱшыл учебный заведенийыште туныктымыж нерген ойлалтеш. 104 статьян авторжо. Тушечын 12 учебно-методический да педагогике практикыште кучылталтше, 56 научный паша улыт. Ятыр гана тӱҥямбал, всероссийский да регион кӱкшытан семинарлаште научный докладым ыштен.

Юрий Сидыгановын вуйлатымыж почеш кок еҥ кандидатлык диссертацийым арален, тудо ялозанлыкым механизироватлыме да средстве специальность дене 7 аспирантын научный вуйлатышыже лийын. Профессор научно-шымлыме проект дене паша-влакым вуйлатен. Университетыште пашам ыштымыж годым агропромышленный комплекслан ик тукым веле огыл специалистым ямдылен. Нуно кызыт Марий Эл ден Россий Федерацийын моло регионласе вӱдышӧ предприятийлаште тыршат. Сай пашажлан «Россий Федерацийын профессиональный образованийжын почётный пашаеҥже» знак (2005 ий), «Марий Эл Республикысе наукын сулло пашаеҥже» чап лӱм дене палемдалтын. Юрий Николаевич пытартыш жапыште Орловский областьын правительстве членже лийын. Тудо агропромышленный комплексысе производственный предприятийлаште вуйлатыше семын, кӱшыл агрообразованийыште, регион кӱкшытыштӧ исполнительный кучем органыште тыршен. Пытартыш кок ий Орловский областьын Правительстве председательжын да губернаторжын агропромышленный комплекс шотышто советникше лийын. 2016 ий март гыч Орловский областьысе ялозанлык департаментым вуйлатен.

Марий Эл Республикым вуйлатышын пашажым жаплан шуктышо Александр Евстифеев тыге ойлен: Юрий Сидыганов республикыш Ялозанлык да продовольствий министерствым вуйлаташ келшыше должность гыч пӧртылын. Тудлан ты пашам шукташ тыглай огыл жапыште ӱшаныме. Профессий шот дене биографийжым ончалаш гын, коеш, тудо – эреак уым кычалше айдеме. Ме пашаште полшаш, тыгодымак республикнан ялозанлыкше качестве могырым вияҥме у кӱкшытыш нӧлталтме лектышым вучаш тӱҥалына. Шкенан республикыште илыше-влаклан кочкыш сатуштым колтен шогышо озанлык-влаклан утларак вияҥашышт йӧным ыштыме нерген шоналташ кӱлеш. Тыглай калык кочкыш сатум келшыше ак дене налын кертме йодышым ӧрдыжеш кодыман огыл.

Погынымашын кокымшо ужашыштыже республикыштына шошо ага дене кылдалтыше йодышым каҥашыме годым тидым палемдыме. Тений шошо тургым вӱдыжгӧ игечылан кӧра кучалтеш, пасушко варашрак лекме. Ынде пашам ятырлан вияҥден, ворандарен колтыман. Тидлан могай ешартыш йӧн, вий улыт – тидын нерген кумдан каҥашыме. Ончыкыжым кеҥеж жапыште озанлык паша дене кылдалтше совещанийым тылзыште ик гана деч шагал огыл, а телым шуэнрак эртараш палемдыме.

В.Смоленцев,

Е.Садовин.

Опубликовать в Одноклассники

Добавить комментарий