УВЕР ЙОГЫН

Верлаште делегат-влакым сайлат

Эртыше изарнян Мер Каҥашын вуйверыштыже Марий калыкын ХI погынжылан ямдылалтме дене кылдалтше икмыняр йодышым ончышт. Погын жапыште кок пленар заседаний да вич секций лийыт.

Оньыжа Э.Александровын палемдымыж почеш, Погыным почмо да петырыме мероприятий М.Шкетан лӱмеш Марий национальный театрыште лиеш гын, секций-влак тӱҥ шотышто Мер-политике рӱдерыште пашам ышташ тӱҥалыт. Вуйверыште лачак секций-влак нерген кумданрак каҥашышт. Районла ден регионла гыч пурышо темлымаш-влакым, секцийлаштат ончен, Погынын резолюцийышкыже лукташ ямдылыман. Тыгак секций-влакын вуйлатышыштым рашемдышт: «Марий йӱла» – Л.Абукаева ден О.Третьяков, «Калыкын ончыкылыкшо» – В.Мочаев ден Р.Чузаев, «Мер паша» — Е.Кузьмин ден С.Пехметова, «Ял да ола» – А.Гайсин ден Н.Пушкина, «Еш, туныктымо паша да шочмо йылме» – Л.Иксанова, Е.Игнатьева, Е.Небогатиков.

Российысе 19 регионышто чылаже 358 делегатым сайлаш палемдыме. Тылеч посна эше Мер Каҥашын кызытсе еҥже-влак делегат статусан улыт.  Ончычсо семын эскерыше-шамыч огыт лий, сандене ынде 2000 гыч огыл, а 1500 марий деч — ик делегат. Тидын нерген онламаш В.Мочаев радамын умылтарыш да сайлымаш кампаний кузерак эртымым рашемдыш. Мутлан, Пошкырт кундем Балтач районышто 4 декабрьыштак делегат-влакым ойыреныт.  А республикыште район конференцийым эн ончыч Морко актив эртарен.

Кугу форумышто волонтер-влакынат надырышт изи огыл. Вес кундемла гыч толшо делегаций-влак дене пашам ыштымаште республикысе Спорт, молодежный политике да туризм министерствын, МарГУ-н, Марий культур рӱдерын полышышт деч посна нигузе огеш лий. Погынын участникше-влаклан кумда культур программе ямдылалтеш.

С.ПЕХМЕТОВА

Опубликовать в Одноклассники

Добавить комментарий