СОЦИАЛЬНЫЙ ИЛЫШ

Куснылаш йӧным ыштыме

Россий Пенсий фондын Марий Элысе пӧлкажын Йошкар-Оласе клиент службыжлан начарын коштшо граждан-влаклан палемдалтше кресле-каталкым налме да тидын дене услугым пуымо йӧным эшеат кумдаҥдыме.

Виктемын специалистше-шамыч «Доступная среда» программе кышкарыште Пенсий фондын услугыжо-влакым пуымо йӧным кумдаҥдымашке да нунын качествыштым саемдымашке виктаралтше «Кӱлешан айдеме-влак» проектым ямдыленыт.

Таче электрон сервис полшымо дене фондын шагал огыл услугыжым мӧҥгӧ гыч лекдеат налаш лиеш, но южгунам клиентлан виктемыш шканжак толашыже кӱлеш. Россий Пенсий фондын клиент службылашкыже начарын коштшо, сусыр шоҥгыеҥ-влакым чӱчкыдын кондат. Нунылан ик кабинет гыч весыш шке семын куснылашышт моткоч неле, вет кресле-каталке дене чыланжак огыт пайдалане. Тидымак умылен, оборудованийым лачшымак тыгай граждан-шамычлан налме.   

Клиент службышто кресле кӱлешак гын, тудым дежурный вахтёр деч йодман. Оборудованийым виктемын холлышкыжо шындыме. Тудын дене зданий кӧргыштат, воктенысе кумдыкыштат, мутлан, виктемыш кондымо еҥым машина гыч кабинет марте пурташ да мӧҥгешла лукташ кӱлмӧ годым, пайдаланаш лиеш. Пандус ден кумда омса клиент службыш пураш ма тушечын мӧҥгешла лекташ сай йӧным ыштат.

Кресле-каталке дене пайдаланыше икымше клиент-влак виктемын тыгай услугыжым путырак йӧнан да кӱлешан семын палемденыт.

Клиентлан виктемыште кресле кӱлмӧ нерген 8 (8362) 42-66-40, 42-88-40  номеран телефон дене ончылгоч шижтараш лиеш.

М.ИВАНОВА

Опубликовать в Одноклассники

Добавить комментарий