Марий аварийно-утарыше службын пашаеҥже-влак Йошкар-Оласе йоча больницын онкогематологий отделенийыштыже эмлалтше изи пациент-шамычлан ӧрыктарыше сюрпризым ыштеныт: нылымше пачашыште верланыше модмо пӧлемыш Йӱштӧ кугыза… окна гыч пурен.
А тудын рольжым модшо икымше классан утарыше Алексей Калинин лӱддымылыкым веле огыл, артист койышыжымат ончыктен. Тудо ӱдыр-рвезе-влакым модыктен, тыгак кож йыр мурым мурен пӧрдыктен. А Лумӱдырын рольжым модшо Саша Калинина ачаж дене пырля пашам ыштыше-шамычын полшымышт дене пациент-влаклан тичмаш спектакльым модын ончыктен, а вара оҥай туштым туштен.
Пайрем мучаште поро утарыше-влак изи пациент-шамычын эмлымверысе илышыштым кеч изишак сӧрастарашлан кӱлешан пӧлекым – тӱрлӧ модышым – кучыктеныт.
М.ИВАНОВА