Москваште публицист, мер пашаеҥ, Моско олаште марий землячествым ыштыше марий чолга еҥ Юрий Иванович Ерофеев дене чеверласеныт да тудым пытартыш корныш ужатеныт.
Шке жапыштыже тудо наций-влак коклаште тыныслыкым да келшен илымашым пеҥгыдемдымыжлан Москва Правительствын Шӧртьнӧ почётный палыж денат палемдалтын. Кужу жап СССР КГБ-н аппаратыштыже пашам ыштен, КГБ-н Марий Элысе управленийжым вуйлатен, РФ Президент пелен республикын икымше полномочный представительже, РФ Кугыжаныш Думын межнациональный йодыш шотышто экспертный советшын членже лийын. Тудо РФ безопасность федеральный службын отставкысе полковникше семын палыме.
«Совет Ушемын патриотшо шке идеалжым арален коден, илышыжым шке шочмо элжылан, марий калыкшылан пӧлеклен… Тудо пеш мунло наставник, сай вуйлатыше, йолташ, ешым кучышо, писатель, поэт лийын…», — ойлат Москваште илыше йолташыже-влак.
С.НОСОВА
