Эртыше идалык мучаште Йошкар-Оласе «Марий Эл» ий полатыште регионысо Молодёжный политике, спорт да туризм министерствын коллегийжын заседанийыштыже 2020 ийлан паша планым пеҥгыдемденыт.
Тушто министр Лидия Батюкова тений ыштышаш паша нерген кумданрак радамлен:
- 2019 ийыште ойыртемалтше 3 спортсменлан Кугыжаныш премийым пуышаш нерген каласен. Ӱмаште тидлан 200 тӱжем теҥге ойыралтын гын, тений — 300 тӱжем теҥге;
- Республикнан 100 ияш лўмгечыже, Сеҥымашлан 75 ий темме лӱмеш спорт дене кылдалтше ятыр мероприятий эртаралтеш;
- турист-влаклан у маршрут-влак почылтыт;
- самырык-шамычлан слёт-влак эртаралтыт;
- майыште куштылго атлетике дене Радион кечыжлан да Сеҥымашлан пєлеклалтше йӱлаш пурышо эстафете эрта;
- районлаште спорт площадке-влакым умбакыже чоҥат;
- Марий Эл вуйлатыше А.Евстифеевын пунчалже почеш, кажне тылзын, пытартыш рушарнян, Тазалык да спорт кечым увертарыме. Тиде паша умбакыже шуйна. Ты кечын ача-ава деч посна кодшо йоча, инвалид, шоҥгыеҥ, шуко шочшан еш, сарын ветеранже-влак спорт объектлаш яра пурен кертыт.
Заседаний деч ончыч Лидия Батюкова спорт дене кылдалтше йоча сӱрет конкурсышто сеҥыше-влакым саламлен. Призёр радамыш логалше Советский посёлкысо 3-шо №-ан школ Максим Яндыганов, 3-шо класс:
– Урокышто спортын кеч-могай видше дене кылдалтше сӱретым сӱретлаш каласышт. Мый волейболым ойырышым. Конкурсшын лӱмжӧ «Спорт – йочан шинчаж дене» маналтын ыле. Такшым мый кокымшо ий вольный кучедалмаш секцийыш коштам. Мемнам тидлан Ирина Владимировна кумылаҥда. Авам дене эше ече дене мунчалтена.
Максимлан шарнымашеш Чап грамотым, футболкым, кружкам кучыктеныт.
Тыгак ты кечын кодшо ийыште спорт мероприятийлам эртарымаште ойыртемалтше еҥ-влаклан Тауштыман кагазым кучыктеныт.
Тиде заседанийыштак «Спорт-норма жизни», «Социальная активность», «Популяризация предпринимательства», «Экспорт услуг» федеральный проект-влакым илышыш шыҥдарыме йодышлам каҥашеныт.
Е.ЭШКИНИНА
