УВЕР ЙОГЫН

Утарен шуктеныт…

У ий пайрем кечылаште Марий аварийно-утарыше службыш полыш кӱлмӧ нерген йыҥгыр пурен. Пашаже теве кузе лийын…

Марий ден ватыже Оръер ер деке канаш лектыныт. Палаткым шынденыт. Пеленышт обогревательыштат лийын, сандене йӱдлан малаш кодаш, колым кучаш шоненыт. Но кечывал деч вара кум шагатлан марийжын шӱмжӧ коршташ тӱҥалын. Воктене нигӧат лийын огыл, сандене пелашыже утарыше службыш йыҥгыртен. Службо вуйлатыше Алексей Беляев утарыше-влакым пеш писын колтен. Виктор Трушков, Михаил Фролов, доброволец-влак Александр Мединов, Евгений Баранов тушко кудалыныт. Пычкемыш лийын гынат, корным муын, туткар лийме верыш миен шуыныт. Пӧръеҥым машинаш пыштен, трассыш луктыныт. Вигак «вашкеполшыш» йыҥгыртымыштлан кӧра, трассыште черлым эмлызе-влаклан пуэныт. Эмлымверыш намиен шуктеныт.

Социальный сеть гоч пӧръеҥын пелашыже утарыше-влаклан кугу таум каласен. Марийжын обширный инфаркт лийын улмаш. Пеш писын да сайын шке пашаштым шуктымыштлан кӧра айдемын илышыжым утарен коденыт. Эшежым ойгыш логаше-влакын погыштым поген, машинаштымат варажым утарыше-шамычак кӱлеш верыш намиен коденыт. Нунылан кузе от таушто!

 С.НОСОВА

Опубликовать в Одноклассники

Добавить комментарий