Марий Элыште тачсе кечылан турист-шамычлан йомак дене кылдалтше 5 маршрутым темлат.
Иктыже Шернур районышто марий Йӱштӧ Кугызан юзо йолгорныж дене эрта. Йомакысе персонаж-влак дене пырля уна-влакым Йӱштӧ Кугыза шкежак вашлиеш да Кукнур селаште верланыше илемыштыже тӱрлӧ семын куандара. Толшо-влак мунчалтен, модын, веселитлен кертыт. Нунылан тушто шокшо кочкышымат темлат.
Вес маршрут пряник дене «ӱпшалтеш». Изи Какшан эҥер серыште вераҥше «модыш» пӧртлаш логалыда гын, тыгак йомак тӱняш куснеда. Йошкар-Ола мучко экскурсий, курчак тоштер, «Изба» кафеште шокшо кочкыш, Йошкин пырысым ыштыме мастар-класс тендам вучат.
Кумшо маршрут «Уна Кудо» этнографий комплексыш наҥгая. Тудыжо — ола деч 17 километр ӧрдыжто верланыше Ким ялыште. Тушто марий калыкын тӱрлӧ кидпашаже, чиемже, кочкышыж дене палдарат. Суртоза ден ватыже чылаштым порын вашлийыт. Вара уналыкеш Йӱштӧ Кугыза ден Лумӱдыр толыт, пырля пайремым эртарат, мурыктат, куштыктат, тӱрлӧ марий чес дене сийлат, модыш дене модыктат, акрет семӱзгар дене шоктыктат.
Нылымше маршрут тыгак маналтеш: «Йӱштӧ Кугызай деке — унала: Йошкар-Олаште теле йомак». Уна-влак йомак олаш логалыт. Тушто Баба Ягам, Йӱксо царевнам, Иван Царевичым, эсогыл Александр Пушкиным, Йошкин пырысым, Змей Горынычым вашлийыт. Пырля шинчын, сувенирым шке ыштен ончат.
Визымше маршрут Морко районысо Унчо селашке темлалтеш. Тудо тӱрыс марий Шорыкйол пайремым эртарыме дене кылдалтын. Тушто вашлийше-шамычат чылан марий вургемым чият, калык йӱла-влакым ончыктат, национальный кочкыш дене сийлат, тидын денак кылдалтше мастар-классым эртарат.
С.НОСОВА
