Пӱтынь элна мучко «Ава ден икшывыже-влак – национальный вургем дене» всероссийский фотоконкурс увертаралтын.
Ийготым ончыде, тушко кумылан кажне еҥ ушнен кертеш. Снимкыште Россий Федерацийысе кеч-могай калыкын национальный костюмжым чиен, ава ден шочшыжо-шамыч веле огыл, тыгак ача, коча, кова-влакат ончыкталтын кертыт. Тыгодым ик участник 1 фотокартычкым гына колтышаш.
Конкурсыш ушнышашлан www.ethno-photo.com сайтыште регистрацийым эртыман. Туштак тудын условийже дене палыме лияш йӧн уло. Тыгак 8-968-441-84-51, 8-967-148-38-32 телефон номерлашке йыҥгыртен кертыда.
Конкурсым 1 мартыште Москваште ЦМТ-ын Конгресс-холлыштыжо эртыше фотовыставке жапыште иктешлат. Тушко заочный этапыш ушнышо-влакын 50 пашаштым ойырен налыт. Тылеч вара нунын кокла гыч сеҥыше семын 10 еҥым палемдат. Конкурсын финалышкыже лекше-влакын пашаштым посна каталогыш чумырат.
Л.КАМАЛЕТДИНОВА
