10 январьыште Марий Эл вуйлатыше Александр Евстифеев РФ прокуратур пашаеҥ кече да Россий прокуратурым ыштымылан 298 ий теммылан пӧлеклалтше торжественный погынымаште лийын.
Тудо ты ведомствыште тыршыше ден ветеран-шамычым пайремышт дене саламлен да шуктымо пашаштлан тауштен.
— Регионысо кугыжаныш кучем орган-влак республикын прокуратурыж дене пырля ятыр ий годсек кӱлешан социально-экономический задачым шуктат, еҥ-влакым тургыжландарыше йодышлам рашемдымаште тыршат. Тыге келшен толшо мерым ыштыме дене 2019 ийыште 4000 еҥлан чылаже 135 утла миллион теҥге кугыт пашадар парымым пӧртылтымӧ. Тидын годымак пашадарым тӱлымӧ шотышто парыман предприятий-влакын чотышт 23 гыч 13 марте шагалемын, — палдарен регион вуйлатыше.
Погынымаште тыгак ойыртемалтше пашаеҥ-влаклан наградым кучыктеныт. Тудын мучашлалтмекше, Александр Евстифеев, республикын прокуроржо Сергей Беляков, икмыняр моло кугу уна ведомствын тоштержым ончен савырненыт. Тудыжым профессиональный пайремышт вашеш почыныт.
Марий Эл вуйлатышын организаций да аналитике виктемжын уверже негызеш Л.КАМАЛЕТДИНОВА ямдылен
